شیعه لر یاسه گلین قلبی لره _ غم گلدی _ غم گلدی
کئچدی ذی الحجه آیی ماهِ محرَّم گلدی _ غم گلدی
اگنه قرا کوینگ گیوب _ دل داغلا
ایوای حسینیم وای دیوب _ قان آغلا
ثارالله _ ثارالله _ ثارالله
بحرِ اندوه و محن جوشه گلیب _ داشلاندی _ داشلاندی
دللری غم بورودی گوزلریمیز _ یاشلاندی _ یاشلاندی
فاطمه دلبرینون بزمِ غمی _ باشلاندی _ باشلاندی
شیعه لر بزمِ غَمَه قلبیده ماتم گلدی _ غم گلدی
اگنه قرا کوینگ گیوب _ دل داغلا
ایوای حسینیم وای دیوب _ قان آغلا
ثارالله _ ثارالله _ ثارالله
شین و افعانه محرمده گلیب _ عالم لر _ عالم لر
هر مکاندا قورولوب بزمِ غم و _ ماتم لر _ ماتم لر
کوچه برزنده گینه اسدی قرا _ پرچم لر _ پرچم لر
حوریلر فرشه پر اوسته قره پرچم گلدی _ غم گلدی
اگنه قرا کوینگ گیوب _ دل داغلا
ایوای حسینیم وای دیوب _ قان آغلا
ثارالله _ ثارالله _ ثارالله
ماهِ غمدور سینه زنلر اورگه _ غم بسلر _ غم بسلر
یاحسین آدینی مین حاجتیله _ دل سسلر _ دل سسلر
ال آتار دامنینه دردی اولان _ بیکس لر _ بیکس لر
چون بو آی دردی اولان دردلره مرهم گلدی _ غم گلدی
اگنه قرا کوینگ گیوب _ دل داغلا
ایوای حسینیم وای دیوب _ قان آغلا
ثارالله _ ثارالله _ ثارالله
فاطمه دلده نوا باشه قراسین باغلار _ قان آغلار
باش آچیب اوغلونا اوخشار اورگین _ غم داغلار _ قان آغلار
اهلِ ارضیله سمائیله اونا _ یاس ساخلار _ قان آغلار
سلسیر درد و بلا اوغلوما هردم گلدی _ غم گلدی
اگنه قرا کوینگ گیوب _ دل داغلا
ایوای حسینیم وای دیوب _ قان آغلا
ثارالله _ ثارالله _ ثارالله
بابِ احسان آچیلیب یول وئرون احرار گلسین _ یار گلسین
فرقی یوخ مومن و یا شخصِ خطاکار گلسین _ یار گلسین
بولاری دعوت ائدیب قولسوز علمدار ، گلسین _ یار گلسین
دئمه بعضی لری چوخ بعضی لری _ کم گلدی _ غم گلدی
ای "خوش قلم" بو درگَهِ _ احساندی
هامّی گدادی تک حسین _ سلطاندی
ثارالله _ ثارالله _ ثارالله
- جمعه
- 28
- آذر
- 1399
- ساعت
- 23:53
- نوشته شده توسط
- یوسف اکبری
- شاعر:
-
ابراهیم تون خوش قلم
ارسال دیدگاه