گوز تیکیبدیر سنه قارداش، دم خنجر ده باشیم
تیز ییتیش دادیمه قویما، قالا اللرده باشیم
منه مین یاره دَگه، ایتمرم البته گیله
قولسوز اولسامدا چتین دشمنه باشیم اگیله
قلبیمین نذریدی بو باش قاباقوندا کسیله
گل ایده حاجت قلبیمی، برآورده باشیم
گر گولون شاخهسی صدمه گوره، خوش رنگی سولا
نه قدهر دوز دوتاسان، گول آخینار ساغا سولا
منه ده صدمه ییتیب، سیّدی! باشون ساغ اولا
قالموری شاخی سینان گول کیمی پیکرده باشیم
دیمیرم قارداشوام، عرصه ده سرلشگروم
یا الیمده عَلمیم واردی عَلم پروروم
منده گر سلطنت عالم اولا نوکروم
خاکبوس اولماییب اولماز در دیگر ده باشیم
سن بیلیر سن، سنه قارداش دیمهدیم اوز باشیما
امر زهرادی کی زحمت ویریرم قارداشیما
گل ایاقوندان اوپوم قوی الون السیز باشیما
اولا تا آخر عمرینده نظرکرده باشیم
??تاپدیم اول گون که ولادت من ایا شاه زمن
اوز قوجاغوندا گوز آچدیم، گل رخساریوه من
نولا ایندی یومولان وقته گوزوم سن گلهسن
عرشه ناز اییلر اول دامن اطهرده باشیم
گَل خجل اییلهدی دونیا سویو، سرلشگریوی
سربلند ایله سرافکنده اولان نوکریوی
جان دوداقیمدادی، پیشواز ایلیر لبلریوی
ایستیر عمرین ویره باشه، لب کوثرده باشیم
من هُمای شرفم، حیف سینیب بال و پریم
نه الیم وار نه عمودیم، نه بیر آیری کَسریم
کاسۀ سر، کُلَه جنگیدی، سینم سپریم
ایستیرم دهریده سرمشق اولا هر فرده باشیم
گر چه ذبح اولماقا باشیم قاباقوندا تلَسَر
خنجر قاتل اسنده اودا شوقیندن اَسر
وار نه جلّادیده جرأت، نه ده خنجر ده کسَر
باخما السیزدی چتین ال ویره نامرده باشیم
راضییم قاتل بیرحم ایله سنگین دل اولا
پردهلی بیر طبق ایچره باشیما حامل اولا
قالا بیر حاله باشیم، قان گوزومه حایل اولا
گورمییه زینبی اغیار آرا بیپرده باشیم
قورولان وقته حسین! محکمهی عدل و جزا
هر شهید اوز باشی الده گلهجک حشره اخا
بیر شهید السیز اگر اولسا، ندیر چاره شها
من نه نوعی اله آللام صف محشرده باشیم
ای ابوالفضل لباسین دییشیب آل یزید
جمع ایدیب سفرۀ احسانیله باشینه مُرید
"منزوی" حقّ دانیشاندا ایلییر حمله شدید
گوی چوگان تعدّی، اولوب اللرده باشیم
- جمعه
- 5
- دی
- 1399
- ساعت
- 23:57
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه