داغلدی گلشن و گل باغبان گئدور بوگجه
یورولدی بلبل خوش نغمه خوان گئدور بوگجه
غراب وردی گلستاندا زنگ تعطیلی
هَزاره ایلدی ترک آشیان گئدور بوگجه
نه یارلرده وفا گوردی نه وطنده صفا
نگار قهریله دامنکشان گیدور بو گجه
ایگرمی سگزیدور گوئیا مه رجبون
مدینه ده گویه یردن فغان گیدور بو گجه
هره بیریله خداحافظ ایلیور اما
حسین بقیعه طرف باغریقان گیدور بو گجه
وطندن ال چکوب اما بقیعدن دویمور
توکور عذارینه اشک روان گیدور بو گجه
دیمه اوگزلین اولان قبره ایندی کیم گیده جک
حسین یرینه امام زمان گیدور بو گجه
بقیعی ایندی او شه ذوالفقار النده گزور
حسین گیدن یولی قلبنده قان گیدور بو گجه
حسین بقیعده آغلور حرملر ایولرده
سپهره زمزمه الامان گیدور بو گجه
گلور ولی گوره هر کیم علیله صغرانی
سولان جماله باخان ناگران گیدور بو گجه
ولی اونوندا گوزی اکبرون دالیجا باخور
نشان ویرور که او گیتدوقجه جان گیدور بو گجه
اوغول آناسینه ایلور اشاره قویما گیده
او گیتسه دلده کی تاب و توان گیدور بو گجه
دورانمورام ایاقا سسله ویر الین الیمه
طبیب النده تب جانستان گیدور بو گجه
ایشقلانور ساتاشاندا گوزوم قرا گوزینه
بو گوزلریم ایشقی ناگهان گیدور بو گجه
گیدور امیدیم الیمدن نه کول توکوم باشما
قبیله ده هامی خویش و کسان گیدور بو گجه
اورکلنوب دیدی ایکاش گیتمیه عمم
دیدیله جمله بنات و زنان گیدور بو گجه
دیدی دیون باباما اکبریم وطنده قالا
دیدیله لیلیه روح روان گیدور بو گجه
دیدی قویون عموم عباسی شهر یثربده
دیدیله خیمه لره پاسبان گیدور بو گجه
دیدی سکینه منیم خاطریمی چوخ ایستر
دیدیله زنگ شب کاروان گیدور بو گجه
دیدی رقیه نی گور اوسته ساخلارام قالسا
دیدیله اصغره لای لای چالان گیدور بو گجه
دئدی بو قافله دن قویمیون اوزولسون الیم
کجاوه لرده یروز اولماسا پیاده گلیم
- شنبه
- 6
- دی
- 1399
- ساعت
- 0:2
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه