دور سیل آنا بوگوزدن آخان‌قانلی یاشیمی
ایتدی زمانه خانه به دوش آل هاشمی
نامه گلوبدی بیعت ایدم ، ایتمسم اگر
شامه هدیه گوندره لر قانلی باشیمی
ترک ایتدیم آشیانیمی مثل پرنده من
گیزلینجه گلمیشم بو مزاره گلنده من
بیعت ایدم یزیده گرگ ، قبروی ئوپم
نه بیعت ایلرم، نه ده قالام وطنده من
الان یزید ایستور اولا امته امام
تکلیف دور هامی ایلیه قانلی بیر قیام
یا بیعت ایله بوینوا سال طوق ذلتی
یا چخ دی بام کعبه ده، اسلامه والسلام
مانع اولار زیارته دشمن ، گلنمرم
دشمن الندن اولماسام ایمن، گلنمرم
سن گل منیم سراغیمه خولی تنورینه
سن گلمسون، کسوک باشیلان من گلنمرم
من تک بیرین‌زمانه سالوب‌تنگه سیخمادی
صبریم ایوین عبث یره غم سیلی یخمادی
الله ویروب ربابه آنا، تازه بیر اوغول
افسوس کوچدی قافله‌مز قرخی چخمادی
وار حقی یثرب اهلی بیابان بگنمیه
سرمست وصل اولان‌داخی هجران بگنمیه
یوخ چارم آلتی آی دولانام داغداشی گرگ
ممکندی سنی آز اولا جانان بگنمیه
بو محنته آنا ئوزون آز دلکباب ایله
باخما دالیمجا آیریلقا صبر و تاب ایله
قالدی ایویمده حسرت، آنا، بیر علیله قیز
رؤياده گیت عیادته تز تز ثواب ایله
- شنبه
- 6
- دی
- 1399
- ساعت
- 19:12
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه