گل آنون عازمدی الان محضر طاهایه زینب
ویر قولاق درسون روان قیل نائب اول زهرایه زینب
ای منیم قائم مقامیم ای منیم نایب منابیم
من وفالی باغبانم سن گُلیمسن هم گلابیم
سعی ایله شام و عراقه صادر اولسون انقلابیم
حقّیمون ایله ثبوتین مردم دنیایه زینب
مندن آل سن درس صبری هر تبهکاره خم اولما
اوستووه غم حمله ایتسه گوزله مغلوب غم اولما
گر سنه من ویرمیشم صود ، سعی ایله مندن کم اولما
پوزما ئوز شان و وقارون هر غم بیجایه زینب
اولمادی افسوس قسمت من چکم بو ایوده نازون
ایلیه م حاضر گلینلیق رختخوابیلن جهازون
بخت اطاقینه کوچنده بیر منیدیم امتیازون
سن کوچنده منده کوچدوم عالم عقبایه زینب
کظم غیظ ایله اوجور که من غم و دردی اوتاردیم
شکر اولا پروردگاره ظلم ثانیدن قوتاردیم
ایله بیر ظلم ایلمیشدی صاحبیمدن اوز دوتاردیم
گورسدم مشکل بو نیلی صورتی مولایه زینب
عازمم تعجیلیلن من محضر پروردگاره
بیر خصوصی سوز واریمدور گل ایدیم الان اشاره
سن منی هر گون چاغیرسون دادوه گلّم دوباره
وعده ی دیدار قالسون روز عاشورایه زینب
خوار اولان وقتده عزیزیم قوم اشرارون الینده
خیمه گهده قالما حیران خیردا قیزلارون الینده
قویما مقتلده حسینی شمر خونخوارون الینده
قدرتون قدری کمک قیل حجّت یکتایه زینب
قارداشین زهرا نشانی تک قویوب مقتلده قاشماز
عجز و لابه خاندان عصمت اللهه یاراشماز
سیندیروب شان و وقارین شمره یالوارماز باش آشماز
کسب فخر ایلر همیشه عصمت کبرایه زینب
مانع اول هر نحویلن دور شمر شومون کینه سیندن
متصّل جانون سپر قیل گوزله حق آیینه سیندن
همّت ایله شمری اوّل سال حسینون سینه سیندن
دوشمه سون باری یارالی سینه سی ایذایه زینب
من او کوینک که توخوردوم زحمتیله بو حسینه
بیر گونی لازم اولاندا ویر او بی یار و معینه
سویسلار اگنیندن اما دوشسه دست مشرکینه
آلمامیش گلمه دوباره یثرب طاهایه زینب
کوینگی اوغلوم گینده کشف ایله آهسته رازین
قول بویون اول اوندا اعلان ایله زهرانون نیازین
اوپ نیابت نیّتیله اوغلومون عطشان بوغازین
بوسه وور سن جایگاه خنجر اعدایه زینب
دوتماقا شام غریبان بو اوغولسوز پادشاهه
قالدی دیداریم سنیلن نصفی یانمیش خیمه گاهه
حاضر اولّام گه تنور خولیه گه قتلگاهه
اوخشارام هر یرده گلّم آه و واویلایه زینب
- شنبه
- 6
- دی
- 1399
- ساعت
- 19:25
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه