جلال اللّهیدور زهرا جلالی
نوال اللّهیدور زهرا نوالی
ساچوبدی سینیه عصمت مدالی
ایدوب عرفانیده سیر کمالی
ایشیقدور زُهره دن نور جمالی
مقام رفعتی عالیدی عالی
او نورین روحیله وار اتّصالی
بلی نوراللّهون اولماز زوالی
آدیلا وار اورکده سوز و سازیم
اودور گردابه دوشسم چاره سازیم
اونون لطفیله یوخ خلقه نیازیم
بدون فاطمه خلقت نه لازم
سلامیم آلسا آرتار امتیازم
او ردّ ایتسه قبول اولماز نمازیم
اوچار عرشه همای عزّ و نازیم
الیمدن دوتسا زهرانون بلالی
خدا که ناظر آدابیمیزدی
بلور زهرا دُر نایابیمیزدی
بقیعی قبلۀ محرابیمیزدی
در احسانی رحمت بابیمیزدی
او گیزلین جلوه سی مهتابیمیزدی
اونا قربان دل بی تابیمیزدی
اونون اوغلی بیزیم اربابیمیزدی
تانور عالملر اول فخرالرّجالی
سلام اولسون یگانه حکمرانه
جهانه حکمراندور اول یگانه
آدی مهدی دی زهرادن نشانه
تیکوب گوز کاینات اول قهرمانه
گلوب حامی اولا آزادگانه
ورا پرچم او قانلی آستانه
آلا زهرانین حقین عادلانه
یخا مین مرحبی حیدر مثالی
گل امداده گوزون قربانی مهدی
ظهور ایت سن حسینون جانی مهدی
قالوب یرده آناوین قانی مهدی
دوتوب جور و ستم دنیانی مهدی
بو بحراندان قوتار ایرانی مهدی
ایشیت فریاد مظلومانی مهدی
ئوزون دوت ماتم زهرانی مهدی
قوتارسون مدّعی بو قیل و قالی
تانور زهرانی گوگلرده فرشته
ملک عاشقدی اول حورا سرشته
تولّاسی محکدور خوب و زشته
سالوبدی گردن احراره رشته
چکر عشّاقی بو رشته بهشته
سراسی بنزمز دیر و کنشته
رضایت ویردی غملی سرنوشته
چکوب آغوشه بیر دنیا ملالی
مریض اولسا شفا زهرادن ایسته
نه دردون وار دوا زهرادن ایسته
نجات ای بینوا، زهرادن ایسته
زیارت هکذا زهرادن ایسته
برات کربلا زهرادن ایسته
گل ای سائل عطا زهرادن ایسته
خلوص بی ریا زهرادن ایسته
اونا قدرت ویروب باری تعالی
ایدوبدی شیعه نی بو غصّه حیران
نیه عرش اولمادی لرزان و ویران
اولیدی کاش دریالر خروشان
صولیدی هر طراوتلی گلستان
قالیدی گون بولود آلتندا پنهان
او گون که شعله چکدی نار عدوان
ایاقلاندی گل گلزار ایمان
همای اهلبیتین سِندی بالی
اولیدی برهم الله بو زمانه
چاتیدی ناله اهل آسمانه
گیدیدی شعله یردن کهکشانه
اله قنفذ آلاندا تازیانه
اولاندا سینۀ زهرا نشانه
باتاندا ناوک مسمار قانه
گلنده فضّه داده یانه یانه
گورنده غنچه نی گُلدن آرالی
چخار آه اهل ایمان سینه سیندن
غم زهراده سوزان سینه سیندن
ئوپردی شاه خوبان سینه سیندن
گلردی عطر رضوان سینه سیندن
نجه چخدی خدا، جان سینه سیندن
ئوپوب مسمار برّان سینه سیندن
سینوب پهلو آخوب قان سینه سیندن
هله قالسون، گوگرمیشدی جمالی
علی گوردی دوشوب زهرا ایاقدان
ایشتدی بعضی سوزلر گل دوداقدان
یانوب از بس یورولدی آغلاماقدان
اوتاندی میزبان گویا قوناقدان
چخاتدی زینبی اوّل اطاقدان
ئولومی گزلدللر چون اوشاقدان
گیدوب زینب سسی گلدی اوزاقدان
آنامون ای خدا پوزقوندی حالی
غرض شمع محبّت اولدی خاموش
اولوب تیر فراقه سینه لر توش
یاتوب خیرالنّسا بسترده مدهوش
سوزوم نسگلّی دی ایتمه فراموش
ویریلدی غسلی یاراولدی کفن پوش
بالالار گلدی ایتدی غملری جوش
جنازیله حسین اولدی هم آغوش
آخوبدی صورته اشک زلالی
او صحنه طاقت آلدی بوالحسندن
حسین سسلندی مادر کوسمه مندن
گوروب عکس العمل جانسیز بدندن
چخاتدی قوللارین زهرا کفندن
که یعنی بلبل آیریلماز چمندن
حسینجان آغلاما درد و محندن
نه سن مندن دویوبسان من نه سندن
آنان بطحالیدی سن کربلالی
ئوزون یورما عزیزیم شیونیله
خداحافظ ایله فعلاً منیله
دالیمجا قاچما توزلی دامنیله
گیدور جسمیم قالور روحیم سنیله
سنی تک قویمارام اهریمنیله
قراریم وار او رأس بی تنیله
ئوزوم گلّم قرا پیراهنیله
دوشن ساعتده سن آتدان یارالی
باشون هر بزم شوره گیتسه گلّم
اگر نزدیک و دوره گیتسه گلّم
قوناق موسایه طوره گیتسه گلّم
کلیسا و قصوره گیتسه گلّم
دااونجا هر حضوره گیتسه گلّم
اگر ظلمات و نوره گیتسه گلّم
کسیک باشون تنوره گیتسه گلّم
عزیزیم گزمرم سندن آرالی
- دوشنبه
- 8
- بهمن
- 1397
- ساعت
- 20:13
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه