آغلاما عمّون سنه قربان رقیه آغلاما
هر سوزون وار ائت منه اعلان رقیه آغلاما
آغلاما سن آغلیاند ا آغلیور آل عبا
گوشه ویرانه ده دل داغلیور آل عبا
خون دل رخساره گزلین باغلیور آل عبا
اهل ویرانه اولور نالان رقیه آغلاما
آغلوری ویرانسراده لیلیِ مضطر قیزیم
سینه داغلور ، باغلوری رخساره اشڪ تر قیزیم
هر سوز اولدوقجا دییور ایوای علی اڪبر ، قیزیم
گوزده گوز یاشی اولوبدور قان رقیه آغلاما
آغلیاندا سن سریّه قاسمه ایوای دییور
گه یولور زلفین توڪور رخساره اشڪین وای دییور
ڪیم باخور اول دلڪبابه اوخشیور های های دییور
بیت الاحزانه دونور ویران رقیه آغلاما
آغلیاندا اضطرابه آل پیغمبر دوشور
وای بالام وای ناله سی ویرانیه یڪسر دوشور
آغلیور لیلا ، ربابون یادینه اصغر دوشور
گه یانور گه ایلیور افغان رقیه آغلاما
ای حسینه سویگلی روح و روانیمسن منیم
پرشڪسته بلبل خوش نغمه خوانیمسن منیم
باغ عصمتدن قیزیم غنچه نشانیمسن منیم
تئز سولان ای نوگل ریحان رقیه آغلاما
آغلاما توڪمه گوزوندن عارضه گو یاشیوی
سسلمه گاهی باباوی گه قیزیم قارداشیوی
گل بالا قوی سینمون اوسته بلالی باشیوی
یات بیر آز دینجل قیزیم بیرآن رقیه آغلاما
آغلاما گل سینمه عمّون سنه قربان اولا
گل رقیه حسرتیله باخما سن صاق و صولا
روز وشب سن بول آنام زهرا ، گوزون تیڪمه یولا
طاقتون الدن آلار هجران رقیه آغلاما
ای آنام زهرایه بنزر گوزلری شهلا قیزیم
گل منه خاطر بو قدری ایلمه غوغا قیزیم
آغلیاندا سن دوشور یاده آنام زهرا قیزیم
گل دئمه (عِجِّل اَیا سُبحان) رقیه آغلاما
سن قیزیم (عِجّل وَفاتی) سویلمه قلبیم یانور
آغلیاندا من ، دل ویرانه اهلی اودلانور
تازه دن ویرانه ده آیری مصیبت باشلانور
غم ائدور دریاکیمی طوفان رقیه آغلاما
روسیه بیر بنده دور "شیدا" دوتوبدور یوز سنه
گوز یوموب هرڪیمسه دن تنها تیڪوبدور گوز سنه
سنده لطف ائت دردی وار بیرآن یازاندا سوز سنه
وئر اوزون اول دردینه درمان رقیه آغلاما
- شنبه
- 6
- دی
- 1399
- ساعت
- 20:59
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه