حسین دریای مِحنَتده عجب غرق بلا اولدون
باجون زینبدن آیرولدون قتیل اشقیا اولدون
حسین مظلوم حسین مظلوم
خزان اولدی گولوستانون اسوب یل تاروماراولدی
گل وغنچه بوداقلارداچمنده خشک اولوب سولدی
حریم عصمته قارداش دو گور زاغ و زغن دولدی
حسین تا سن بو میداندا ذبیحأ من قفا اولدون
گورنده شمر ملعونی اورکدن اوددوتوب یاندیم
الیملن خنجرین دوتدوم کشا کشده یارالاندیم
دئدیم ذبح ایلمه عطشان عبث سایدی الولاندیم
یتیردی وصلتی فصله حسین مندن جدا اولدون
حسین بوعشقون اوستونده منی چولدن چوله سالدون
چکولدون داره عیسی تک منیم آرامیمی آلدون
ویروبلار نیزه اوخ شمشیر ندن بوحالته قالدون
نه جرمیله باجون اولسون بیله غرق دما اولدون
بوچولده یالقوزام قارداش آتام یوخدی آنام یوخدی
یاتوبسان اَرخَن اوستونده باشون یوخدی یاران چوخدی
منی چوخ آغلادان بوسینه ده اوچ شعبه لی اوخدی
بویاندون قانیوه قارداش بو قرآنه فدا اولدون
ابوالفضلین اُولن ساعت پوزولدی حالتین قارداش
قلم اولدی ایکی قولدان کسولدی طاقتین قارداش
اوزوم گوردوم بیلون سیندی بوکولدی قامتین قارداش
بوکولموش قدّیلن سن رهسپار بو مِنا اولدون
باشون نی ده گیدر شامه گورنده قان گلر جوشه
گویول ایستر الیم چاتماز چکم من جان تک آغوشه
سنی زهرا آنام جانی حسین بیرآنی گل هوشه
منه چاره یولون گوستر دیمه غم ابتلا اولدون
دوشوب سنسیز باجون امری نقدری مشکله قارداش
قولی باغلی گیدر شامه گیدونجان کاش اُله قارداش
الور شمر وسَنان یولدا بیزه سر قافله قارداش
باجون عشقون اسیری سن غریب کربلا اولدون
حسین آسوده یات زینب یترعشقینده میثاقه
آچار همّت لواسیلن یولون دنیاده عشاقه
اولاربونهضت عالم گیرچاتار سس عرش نُه طاقه
بوعالی نهضته سنسن که قارداش رهنما اولدون
هجوم اشک چشمیلن هاراچاتسام علم ویررام
قوروب بزم عزا نقش یزیده من عدم ویررام
دییر(عدلی) بومطلبده نفس وارتا قلم ویررام
سن ای زینب شریک نهضت و صاحب لوا اولدون
- چهارشنبه
- 17
- دی
- 1399
- ساعت
- 23:11
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه