شیعه لر قان آغلیور بر پا اولوب بزم عزا
سنده گل صاحب زمان جدّون اولوب دینه فدا
حضرت هادی النقی دورگوزیوموبدی بوسحر
سوّم ماه رجب ده ایتدی عقبایه سفر
گوئیا باتدی ولایت آسمانینده قمر
قاره پوش اولدی بوغمده آغلوری ارض وسما
سنده گل صاحب زمان جدّون اولوب دینه فدا
بوامام افلاک علمه چون وجودی آفتاب
ایتدیلر مسموم ندندی گل یوزه چکدی نقاب
آلدی آغوشه اوینده پیکرین تیره تراب
آغلوری زهرا آنان هم آغلوری عرش خدا
سنده گل صاحب زمان جدّون اولوب دینه فدا
رهبر اسلامیان اسلامه عزّت سایه سی
اولدی مستحکم بونیله ملک دینون پایه سی
باتماقی گون تک اولوبدی شیعیه غم مایه سی
تا قیامت شیعه لر بر پا ایدر بزم عزا
سنده گل صاحب زمان جدّون اولوب دینه فدا
هادی کلّ جهان باغ سخاوتدن ثمر
شعشعه سالموشدی علمی عالمه مثل قمر
معتزین زهری ندندی جانینه سالدی شرر
ایلدی مسموم امامی تا سولا باغ ولا
سنده گل صاحب زمان جدّون اولوب دینه فدا
گرچه ترک ایتدی جهانی اول امام ممتحن
شیعه لراولموش فراقینده بوگون غرق محن
قالمادی امّا حسین تک جسمی بی غسل وکفن
اوزبابان دفن ایلیوبدی دلده مین آه ونوا
سنده گل صاحب زمان جدّون اولوب دینه فدا
پیکری قالدی حسینون اولمادی غسل و کفن
ایسّی قوم لار اوسته یاتدی اوچ گجه شاه زمن
نه الی وار نه باشی سانسیز یارا دگمیش بدن
یاره لردن سینه سینده گل آچوب باشدان باشا
سنده گل صاحب زمان جدّون اولوب دینه فدا
آه اوساعتدن گوروب دور زینب بختی نگون
فلک امیدی اولوب مستغرق دریای خون
وارسپهرپیکرینده یاره انجمدن فزون
اولدی اول نوحه خوانی قهرمان کربلا
سنده گل صاحب زمان جدّون اولوب دینه فدا
قانینه غلطان گوروب قارداشینه ایتدی خطاب
دستمازی ای اولان بو یرده قانیلن خضاب
یولانور بوغم قطاری ایلوری بی حد شتاب
بو بلا دشتین حسین سن ایلدون ملک منا
سنده گل صاحب زمان جدّون اولوب دینه فدا
قتلگاه عشقیده قارداشلارون غرقِ دِما
هم اوزون همره لرون ائتدوز بوقان ایچره شنا
سینۀ سینا لروزدی باش باشا هر یر یارا
اولدی گلشن قتلگاهوز روح وبخش وبا صفا
سنده گل صاحب زمان جدّون اولوب دینه فدا
آیرولوب سندن حسینیم دیده گریان گیدیرم
همرهیم شمروسناندی اورگی قان گیدیرم
دفن ایدم بو تن عریانی یوخ امکان گیدیرم
آغلوری بوغمده (عدلی) شافع اول روز جزا
سنده گل صاحب زمان جدّون اولوب دینه فدا
- پنج شنبه
- 18
- دی
- 1399
- ساعت
- 12:49
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه