من نقدری بوسراب استاندا مهمان اولموشام
مرگ ومحشرفکرینه چون بیدلرزان اولموشام
موج دریا ساحل آرامی طوفان ایلیوب
من بوطوفان ایچره غافل غرق عصیان اولموشام
گه شکایت گلدن ایتدیم گاه شکوه خاریدن
آیری دوشدوم گل چمندن دل پریشان اولموشام
ترک مستی ترک عشق اوسته اورکدن نادمم
می پرستم ترک بیجادن پشیمان اولموشام
زاهدین کاشانه سی بیر ساغره اولسا خراب
من همان دیوانیم سیلابه ویران اولموشام
نورونی تا سالدی روحه آفتاب وصل دوست
میزبانم مهر و نوره مست و مستان اولموشام
نورعشقی حاکم اولدی تا منیم بو روحیمه
من اوگوندن خادم شاه شهیدان اولموشام
شستشو ایتدیم دلی تاچشمۀ خورشیدیدن
سرفرازم یوخ غباری شاد و شادان اولموشام
وصلینه آسایش دل واردی روز محشره
محفل عشقینده جزء میگساران اولموشام
من غلام حلقه در گوش حسینم تا ابد
محفلینده اورگدن معنای قرآن اولموشام
گوزیاشیم وارکربلانون غملرینده روزوشب
بزم غمده هرعزاده نای نالان اولموشام
ایلر از بس روحه تاثیر طاقتی الدن آلار
سود امر سربازه دائم شمع سوزان اولموشام
حرمله تیر سه پر ویردی قـانی قاتدی قانا
گولدی گوز ومدی اوحاله دیده گریان اولموشام
غنچه گل پرپر اولاندا اللری اوسته دئیدی
من حسینم باغبان بی گلستان اولموشام
کربلایه بیرگلستان گل گتوردوم سولدولار
منده سوللام پای بست عهد یزدان اولموشام
عاصیدور«عدلی»ولی خادمدی بودرگاهیمه
نوحۀ اصغرده سویلر ابر نیسان اولموشام
- جمعه
- 19
- دی
- 1399
- ساعت
- 23:14
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه