سوروش باد صبادن یا محمد
خبر دوت کربلادن یا محمد
خبر دوت اول چولون هنگامه‌سیندن
حسینون قانه باتمیش جامه‌سیندن
باشیندا دوغرانان عمامه‌سیندن
جفای اشقیادن یا محمد
خبر دوت پیکر صد پاره‌سیندن
علیّ‌اکبر - مهپاره‌سیندن
دگن قلبینده‌کی اوخ یاره‌سیندن
آخان خون خدادن یا محمد
سوروش نولدی ابوالفضل علمدار
حسینی ئولدورنده قوم اشرار
هایاندا قالدی بس یتمیش‌بیر انصار
او چول دولدی جفادن یا محمد
سوروش نیلوبدی شاه مشرقینه
بو گونده لشگر بد ذات و کنیه
صدای ناله و شیون حسینه
گلور طاق سمادن یا محمد
سوروش اوردا قالوب نه حاله اوغلون
سولوبدور ظلمیله چون لاله اوغلون
یوز اوسته دوشدی بیر گوداله اوغلون
چیخوب جسمی نمادن یا محمد
آناسی گلدی معناده نوایه
حسینی اشقیا آلدی - آرایه
یاغیش مثلی او دم کرب و بلایه
یاغوبدور اوخ هوادن یا محمد
چیخوب قرآن کیمی شیرازه‌سیندن
آخور القانی زخم تازه سیندن
گچوب اوخ یاره‌سی اندازه‌سیندن
یاغور غم‌ماسوادن یا محمد
یارالی حالیله دوردی نمازه
الین آچدی او دم راز و نیازه
نماز اهلین یتوردی امتیازه
دوشوب اوغلون قوادن یا محمد
اسوبدور باد غم عالم قرالدی
ملکلر قاره معجر باشه سالدی
حرملر جام صبرین داشه چالدی
مصیبتدن بلادن - یا محمد
یتوبدور قتلگاهه شمر ملعون
گوروب اول تشنه شاهی غرق در خون
غمِ خیرالنّسانی ایتدی افزون
گیدوب راه خطادن یا محمد
الینده خنجری فریاده گلدی
او دشته حضرت زهراده گلدی
گوروب اوغلون او حالدا داده گلدی
آمان شمر دغادن یا محمد
نماز اوسته او شاه مشرقینین
سوسوز تنها امام قبله‌تینین
عزیز عالم و آدم حسینین
کسوب باشین قفادن یا محمد
سمایه مریم و عیسی نواسی
خلیل و آدم و موسا نواسی
آناسی حضرت زهرا نواسی
اوجالدی نینوادن - یا محمد
حسینه آغلادی جنّتده حورا
گلوب نطقه کسیک باشیله یحیی
فَداکَ یابن کوثر یابن زهرا
دیدی طشت طلادن یا محمد
دوتوبدی عالم امکانی ماتم
بو غمده "اکرمی" آغلار دمادم
الینده ناله ایلر خامه‌ی غم
یازاندا کربلادن یا محمد
- پنج شنبه
- 2
- اردیبهشت
- 1400
- ساعت
- 13:36
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه