روز محشر اولماسون الله بو شیعه شرمسار
اوز شفیعین گورسون اوردا بیرده لطف کردگار
گل وَهَب احوالینه گوز یاشینی ایله روان
روز و شب نی تک سیزیلدا ایت غمینده آه و زار
اول وهب که دشت غمده گوردی غمگین مادری
خسرو لب تشنگانی بی معین و غمگسار
یوز دوتوب اوز اوغلونا ای شیر مادر خور بالا
گوش جان ویر پند دور سوز چو درّ شاهوار
ای وهب عالم فنا دور بی وفا با جفا
هیچ کیمه اِتموب وفا چه پیر اولاچه شیرخوار
عمر اولا گر نوح تک دنیاده اِت سَن زندگی
شیر دور آخر اَجَل ایلر سنی بیر گون شکار
باغلاما دل عشق دنيايه منه اي روح وجان
شوكتي چوخ بي ثبات ودولتي وار بي مدار
جان شيرين تلخ دور سود اُلماسا بوجانيده
سود وِيرَر اوندا قدوم شهده اولسون جانثار
بو همان صحراي عشق و بو همان كرب و بلا
بوهمان جانانه جان عالمده صاحب اختيار
يوخدي بيرجانان سنه غير از حسين ابن علي
چات شهادت فيضينه منده اولوم خدمتگزار
تا ايشيدّي بوكلامي اوز آناسيندان وهب
امره تابع عرض ايدوب من ده آنا ليل ونهار
قلبيده آرزيم بو دور بوگون اولام دينه فدا
وادي عشق ايچره جاني ايليم تقديم يار
وارسنون بير نو عروسون ليك ويرسن اذن اگر
آخرين ديداريمي اوندان ايديم اي گلعذار
آلدي رخصت تازه داماد گلدي ايتسون تا وداع
شورعشقیله لبالب عشقیدن گوز اشكبار
عرض ايدوب مِحنَت كش ايّام هنگام وصال
دوندي فصله فرقته سن اولما بيله بيقرار
من ايچم جام شهادت باغلاديم محكم كمر
مذبح عشق ايچره قربان حسين فخركُبار
چون ايشيدّي نو عروس جام شهادت كلمه سين
گيتدي طاقت بار ايدوبدور سينه ده غم بي شمار
اشك چشمين دّر تك جاري ايدوب رخسارينه
عرض قيلدي سن مني بو چولده ايتدون خوار و زار
ايسته سن راضي اولام سن شهد شيرين ايچماقا
وارايكي حاجت روا قيل ايت مني اميد وار
حاجت اوّل بودور ياددان چخاتما سن مني
حورعينون وصلينه جنّتده اولما كامكار
حاجت دوّم بو دور دوت بو اَليمدن تا آپار
زينبه تاپشور منی ايتسون كنيز ترسكار
هر ايكي حاجت قبول ايتدي وهب اوز همسرين
آننون اُپدي زينبه تاپشوردي اول پرهيزگار
پس وداع ايتدي گيوب دور جامة رزمي تنه
لحظه گچماقدا گوروبلر اولدي تا مركب سوار
خسرو خوبانيدن رخصت آلوبدي تا وهب
سوردي مركب عشقيني ميدانه اولدي راهوار
تا يتوب ميدانه دل آجدي رجز خوان اولماقا
ذكر الله اوّل ايتدي چكدي تيغ شعله بار
من وهب بير عشق بازم خادم كوي حسين
عرصه ده من مرد جنگم وار ديليمده بو شعار
عشق شاه كربلا قلبيمده طوفــان ايليوب
قوخمارام بو رزميده گر عدّه ز اولسا صد هزار
تازه دن بيرجان تاپار بو تن اولا آماج تير
تيغ دشمن گر ياغا مانند باران بهار
مرد سوز بير بيرگلون جنگه اولاخ تا رو برو
عرصة ميدانيده مرد ايستور ايتسون كار زار
اولمادي اول قوم كافردن بيري جرأت تاپا
شيريلن جنگ اتماقا ميدانه اولسون رهسپار
دوزمه دي چون شير تك حمله ايدوبدور دشمنه
جنگه دارا مرد الينده تيغ تيزآبدار
نچّه سين اُولدوردي دشت كربلا دولدي قانا
صحنة ميدان دگرگون دشمني ايتدي شكار
بير نمايش گوستروب دشمن دوشوبدور وحشته
هم قرين شير اولانماز روبهان ايلوب فرار
اولدي خسته خونه آلوده جوان نامدار
ترك ايدوب ميداني گورسون مادرين اول با وقار
عرض ايدوب اي مادر غم پروريم اولدون رضا
ايله اظهار اي منه روح و روان والا تبار
قول سالوب دور بوينونا اُپدي يوزوندن تا آنا
پاك ايدوبدور چهره سيندن قاني هم گَرد و غُبار
گلدي گفتاره ديوب اي جان من نور بصر
راضي اولّام سن شهيد و من اولام شب زنده دار
اللرين اوپدي آنانون يوز قويوب بار دگر
گلدي ميدانه اولا تا بيرده دينه جان سپار
بير رشادت گستروب ميداندا تاب ايتدي وهب
تا جدا اولدي بدندن اَل يمين دن هم يسار
باشيني تندن جدا ايتدي جفادن قوم دون
ليك مادراولمادي وضعين گورنده ديده تار
رأس خون آلودي اوپدي آتدي دشمن سمتينه
سويله دي اي قوم پست وتيره بخت روزگار
بو باشي الله يولوندا ويرموشم دل ايسته مز
بيرده وصل اولسون دو باره تنده قالسون استوار
ماجراي كربلادن شمّه اي ايتدون رقم
وصفه گلمز «عدلي» امّا خامن اولسون پايدار
- شنبه
- 20
- دی
- 1399
- ساعت
- 20:39
- نوشته شده توسط
- یوسف اکبری
- شاعر:
-
حاج اصغر فرشچی
ارسال دیدگاه