گِنه ئوز دردیمی قوی گُنبد مینایه دیوم
بو اَسَن یللَره یا گویده گَزن آیَه دیوم
آغلیان گوزلرووی دست اَجل تِز یومدی
سالدی کاشانمیزه قارَه دومان سایه دیوم
سن گلستان رِسالتده آچان بیر گُلیدون
ئوز اِئوینده نَه گلوبدور گُل طاهایه دیوم
دوغری سوزدورکه دیللَرگُلون عمری آز اولار
عُمروون شَرحینی قوی لالهء حَمرایه دیوم
بو جوان ئولمگووُن داغی قوجالدوبدی منی
دوندروب گوندوزومی لیلهء یَلدایه دیوم
سندن آیری نِجه من دردیمه هَمناله گَزیم
داغلارا ،داشلارا ،یا پَهنهء صحرایه دیوم
ماتمونده ائله بِیل گوزیاشیم عُمّانَه دونوب
بوآخان گوز یاشیمون شَرحینی دریایه دیوم
نگرانم گِنه سندن صورا ایللَر یاشیام
سَنسیز ای فاطمه جان اُف اولا دنیایه دیوم
درگهی که اونا زَوّاریدی جِبریل اَمین
مقتل اولدی بوقاپی مُحسنه زهرایه دیوم
یانماسیدی قاپومیز گوز داغی اولمازدی منه
اِیتی مِسماری سالور روحیمی اِیذایه دیوم
آیریلق دردی منی مُشتری اِئتدی ئولومَه
یوخ دوزوم منده بِله مِحنت عظمایه دیوم
(نادرم) ذکر غم شاه وِلادن یازورام
بیلمورم هانسی غمینده گَلیم آوایه دیوم
- یکشنبه
- 21
- دی
- 1399
- ساعت
- 12:0
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه