زهرانی تاکه دفن ائلدی شاه لافتی
اگلشدی قبری اوسته بیرآز ایلدی نوا
دار و ندارینی گئجه دفن ایلدی علی
گنج نهان عزّتینی قویدی توپراقا
ایستوردی یاریله اوزی بیر صحبت ایله‌سین
اصحابی قِیتروب او زمان میر مقتدا
اگلشدی باش طرفده بیرآز آغلادی اوزی
گویا اوشاق کیمی او شه آغلوردی بی صدا
قلبین بوشاتدی دوردی ایاقه یواش یواش
یول باشلیوبدی منزلینه فخر اولیا
گر اولماسِیدی ائوده اوشاقلار گمانیمه
گَلمزدی بیرده هیچ او ائوه میر ماسوا
هم روحاً اینجیوب،همی کوسموشدی شهریدن
مایل دگلدی فاطمه‌سیز، شهریده قالا
دنیایه اوچ طلاق وئرن نیلوری ائوی
زهراسیز ائو نه لذّتی وار گر بهشت اولا
القصّه آیریلوبدی بقیعدن شه زمن
بیر نحویله خلاصه ائوه گَلدی مرتضا
اطفالی یاتماموشدی،گوزتلوردیلر یولون
بیر انجمن خصوصی قوروب دوتدولار عزا
تا صبح اولونجا هئچ بیریسی یوممادی گوزین
صبح اولدی،گون چیخوب وئریلوب عالمه صفا
ثانی یغوبدی باشینه بیر عدّه جیره‌خوار
گَلدی بقیعه تا گینه‌ده خلقی تولیا
پیغمبرین قیزی دئدی گیزلینجه دفن اولوب
نبش ایلیون،خلیفه نمازین گرک قیلا
گَلدی خبر که یاعلی بس هاردا قالموسان
آز قالدی قبر فاطمه‌نی بو دنی آچا
یتجاق بو سوز قولاقینه اُول خسته دل شهون
چوخ هولیله ایاقه دوروب شاه اوصیا
گَلدی تموّجه شرف حیدریّتی
دریا کیمی تلاطم ائدوب بحر هَل اَتی
حالی دولاندی،یکسره قان دوتدی گوزلرین
گویا که قان ایچیردوب اونا ساقی بلا
بوینوندا عقده‌لندی عروق حمیّتی
اَل ذوالفقاره آتدی شهنشاه قُل کَفی
باغلوبدی باشینه ساری دستمالی غیظیله
چوخ سرعتیله ائودن او لحظه دوشوب یولا
زینب دوروب ایاقه او دم باخدی آغلادی
یاندوردی مرتضانی،دیله گَلدی گوئیا
سندن‌صورا داخی آنامون یوخدی بیر کسی
چک ذوالفقاریوی سنه قربان اولوم بابا
تک گیتمه،ویر اجازه که قارداشلاریم گَله
تک گورمه‌سون اقلّی سنی قوم اشقیا
چوخ سرعتیله چیخدی غرض آستانه دن
یَپراق کیمی اَسوردی غضبدن او مقتدا
یتدی بقیعه ثانی گریبانینی دوتوب
ووردی یره،بویوردی اَیا معدن خطا
زهرا دگول،بو قبریده روحیم یاتوب منیم
باخما زمانه‌ده هله بِش‌گون دولانماقا
زهرا دیه‌دیه هاموزی دوغرارام بوگون
بیر نحویله که بحر کیمی موج ائده دما
باخما اوگونده کوچه‌ده ووردون دانیشمادیم
امر رسولیدی که گرکدور مطاع اولا
غسلین وئرنده گوردوم اوزوم سیلینون یرین
بسدور،حیا ائله داخی ای پست و بی‌حیا
بیر نبش قبره یاعلی سن صبر ائدنمدون
کرب‌وبلایه بس نیه هئچ گَلمدون شها
بیر سینه‌ایکه اوندا اوغول داغی واریدی
آتلار ایاقلادی،داغیدوب مثل توتیا
سینه سناندا فاطمه سسلندی وای اوغول
جنّتده گَلدی نالیه ارواح انبیا
- یکشنبه
- 31
- مرداد
- 1400
- ساعت
- 17:39
- نوشته شده توسط
- یوسف اکبری
- شاعر:
-
حاج داود صادقی تبریزی
ارسال دیدگاه