قوجالیقدان گجه آئینه منه وئردی خبر
نَه خبردور بو خبر اِئتدی مَنی زیر و زَبَر
یِل اَسَنده او گجه آچدی آتیشقانی ،دئدیم
منیم آنلیمدا او قِوریم تِلیم اَلانه گَزر
لامپا که یاندی ساتاشدی گِنه آئینه ، گوزه
اِیستَدیم اوندا گورَم بیرده او قاش گوزدَن اثر
باخدیم آئینیه امّا آتامی گوردوم او دَم
یوز گوزومده قیریشیقلار چالور آهنگ سفر
اوندا بیلدیم نِیه چوخلاری منی سَسلور عَمی
دَهر اَله آلمیش اَلَک باشیمه گونده اون اَلَر
اِیستَدیم سِیندیرام آئینَه نی گوردوم بِلَه اِیش
چوخ اوزاقدور کِیشی لیکدَن دوزی سِیندیرسام اگر
دئدیم ای آئینه اِنصاف ائله سِیندیرما منی
سنه مونس مَنیدیم عُمر بویی شام وسحر
اوزولوب چاره فقط آهه گمان اِیلَمیشم
عُمری ساتدیم ولی بِیلمَم منه قالدی نَه ثَمر
(نادرا) سِیر زمانه نِجه سِیندیرسا سنی
چوخ اِیگیددَن سنی باشقا بیلوری اَهل هُنر
- یکشنبه
- 21
- دی
- 1399
- ساعت
- 22:37
- نوشته شده توسط
- یوسف اکبری
- شاعر:
-
حاج نادر بابایی
ارسال دیدگاه