اي يوزي گون مثلي تابان ؛ نيزه اوستن جان عم اوغلي
باخ من زاره گوز آلتي ؛ گوزلره قربان عم اوغلي
آي مثالي راس ني دن ؛ عالمي روشن ايدوبسن
بو بيابان كويري ؛ صحنه گلشن ايدوبسن
قانلي گيسولر يوزونده ؛ مثل بيرجوشن ايدوبسن
ياخشي گورسنمور جمالون ؛ چون دوتوبدي قان عم اوغلي
كيم سني بوحاله سالدي ؛ اي گل باغ محبت
هيچ ياراشمور طوي گوننده ؛ تازه داماده بو خلعت
تللري قاندان محنا ؛ نيزه ده ايتسين اقامت
نازيلن باخ نوعروسه ؛ قانيلن الوان عم اوغلي
لاله تك قانه باتوبسان ؛ اي گل باغ پيمبر
ظلم اليلن سن سنوبسان ؛ شاخه شمشاد حيدر
من مريض عشقون اولدوم ؛ غملرونده نازلي دلبر
بير فقط سن سن جهاندا ؛ درديمه درمان عم اوغلي
رحم ايله بو دلغمينه ؛ زلفووي توكمه عذاره
قوي گوروم قاره گوزوي ؛ قاره زلفون چك كناره
بو غريب و بينوايه ؛ نيزه اوستن قيل نظاره
چيخدي نه تئز بس يادونان ؛ عهديله پيمان عم اوغلي
من كيمي بير قاره بختين ؛ حالينه دريالر آغلار
طوي لباسون هرگورنده ؛ نوعروسون قلبي داغلار
طوي اتاقون باغلي قالدي ؛ سولدي بو ماتمده باغلار
بير عمير سن سيز جهان دا ؛ تاپمارام سامان عم اوغلي
(آذرين) گونده قان آغلار ؛ سن قالان احواله قاسم
چوخ يانار بو غصه دن كي ؛ چاتمادون آماله قاسم
رحم ايده حاشا بو دشمن ؛ زيور و خلخاله قاسم
چون سويالار نوعروسي ؛ رحم سيز عدوان عم اوغلي
- پنج شنبه
- 25
- دی
- 1399
- ساعت
- 9:26
- نوشته شده توسط
- یوسف اکبری
- شاعر:
-
ودود آذرین خلخال
ارسال دیدگاه