ای منه هر یرده شریک محن
قانه باتوب نوگل باغ حسن
گل باجی گل دادیمه
تئز یئتیش امدادیمه
یاوریمون چهره سی دوتقوندی گل
جنگ ائلیوب خسته دی یورقوندی گل
حالی حسینون ائله پوزقوندی گل
طاقتی یوخدور باجی
یاره سی چوخدور باجی
دشمن الیندن بالامی آلمیشام
دلده نوا خیمیه یول سالمیشام
تازه گلیندن نگران قالمیشام
تازه عروسین گولی
کامه چاتوب سویگولی
کامه چاتوب غصه دن آزاد اولوب
گؤر نه گؤزل سوئملی داماد اولوب
آغلا باجی خانه سی برباد اولوب
باغ حسن سولدی گل
بختی تالان اولدی گل
قارداشیوون قلبینی غملر سئخوب
یاوریمی عرصه ده دشمن یئخوب
اکبریمون دردی یادیمدان چئخوب
وئر خبر عباسیمه
صدمه یئتوب قاسمه
گل باجی بی تاب و توان گلمیشم
الده اون اوچ یاشدا جوان گلمیشم
خیمه لره قدی کمان گلمیشم
قلبیمه داغ ووردیلار
صبر ائویمی یئخدیلار
گؤرسه آناسی سینه سین داغلیار
نوحه دئیوب سینه ووروب آغلیار
کیم بالامون یاره لرین باغلیار
شال عزا باغلیون
قاسمه یاس ساخلیون
پایگاه حفظ و نشر آثار عباسی معروفان اهری
- دوشنبه
- 24
- آذر
- 1399
- ساعت
- 14:58
- نوشته شده توسط
- یوسف اکبری
- شاعر:
-
ابوالفضل عباسی معروفان
ارسال دیدگاه