گل باغ وفا عباس یل مشکل گشا عباس
دوشن قولاروا قربان ایله درده دوا عباس
سن الگوی شجاعت سن سنه هرپهلوان قربان
حسینون جیسمینه جان سان سنه جان جهان قربان
خدای عشق و ایمان سان سنه کروبیان قربان
ادب گنجی سنه ویرمیش الهی بیر بها عباس
جهان دا امت حقه بصیرت اورگدن سن سن
یلان عرصه جنگه شجاعت اورگدن سن سن
بوتون بخشنده اشخاصه کرامت اورگدن سن سن
حسینون یارو دلداری گوزل بیرمه لقا عباس
علینون عزت و جاه و جلالی سنده دی سنده
حسن بن علینون خوش خصالی سنده دی سنده
حسینون حلمی هم زیبا جمالی سنده دی سنده
گلستان علی دوتموش غرض سندن صفا عباس
یل ام البنین سن هم گل بستان حیدرسن
شعیب و موسی و عیسی و نوحه میر وسرورسن
گوزلیکده هزاران یوسف کنعانیدن سرسن
سنه تعظیم ایده خوشدی تمام ماسوا عباس
کمالون حد عقلیمدن علینون اوغلی خارج دی
کمال و فضلوون آقا گینه بازاری رایج دی
قاپوندا بنده دی شاهلار آدون باب الحوائج دی
اوزون قولاروی درده ایدوب درمان خدا عباس
بلادشتینده ایتدون سن وفا و غیرتی تفسیر
امان نامه گلوب اما مسیرون تاپمیوب تغییر
اولوبدی شهرتون عباس بوعلتدندی عالمگیر
او بوینوندا اولان دِینی گوزل ایتدون ادا عباس
چاتوب عالی مقاماته علمدارحسین اولدون
سبوی عشق تک آب حیاته لب به لب دولدون
ایله کی قحط آب اولدی سارالدون گول کیمی سولدون
کانه غملی طوفانه دوشوب صاحب لوا عباس
غرض سومشکی چگننده فراته رهسپار اولدون
سویندی خیمه ده قیزلارحسینه افتخار اولدون
آلوبسان خصمیدن نهری اورکدن کامکار اولدون
ویروبسان پرچمی نهره یتیشدون تا سووا عباس
سومشکین دولدوروب چیخدون مدال افتخارآلدون
اوزون سوایچمدون عطشان خیامه ساری یول سالدون
خیام آل حیدرده سوسوزلارقیدینه قالدون
نیستاندان یولی سالدون یل حیدرنما عباس
قشون هرسمتیدن حمله ایدوب اطرافوی آلدی
غرض دشمن کمین ایتدی اوزون قولاروی سالدی
گوزوندن دگدی بیرپیکان قان ایچره غوطه ور قالدی
جهان بوغصه دن اولدی بوتون ماتمسرا عباس
قلم یازما مقابلده اودم نوفل پدید اولدی
انوب باشدان عمودآهن غم و دردون شدید اولدی
دگوبدی مشکوه بیر اوخ امیدون ناامید اولدی
سنون تک گلمیوب گلمز مجاهدمطلقا عباس
باخوب اخیامه سسلندون داخی امداده گل قارداش
باتوب سرلشگرون قانه آماندی داده گل قارداش
باشیم اوسته الی بیلده گلوب زهراده گل قارداش
بو آخرلحظه قوی بیرده سنون عطرون آلاعباس
علینون باوقار اوغلی گوزوندن شاعرین آتماز
ایکی دنیابو اشعارین مسلم قیمتی باتماز
شعوری شاعرین اولسا کتابین درهمه ساتماز
شفاعت(آذرین)ایلر سنی روز جزا عباس
- دوشنبه
- 29
- دی
- 1399
- ساعت
- 15:16
- نوشته شده توسط
- یوسف اکبری
- شاعر:
-
ودود آذرین خلخال
ارسال دیدگاه