ای دخت امام حقِّ مظلوم
اخت الحسنین"ام کلثوم"
زینب کیمی سنده باوفاسن
آیینه ی عفت و حیاسن
ای دختر مه لقای کوثر
فخرایلیوری سنه ده حیدر
سن زینبه سویملی باجیدون
سنده غم عشقه آماجیدون
اوغمزده نین حالینه یاندون
آردینجا گیدوب شامی دولاندون
مونس اونا اولدون هربلاده
یاندی اورگونده کربلاده
زینب کیمی جام محنت ایچدون
رخت غمی سروقده بیچدون
دریای مصیبت ایچره اوزدون
طوفان بلاده سنده دوزدون
قارداشلارون ئولدی کربلاده
سن صابریدون غم و بلاده
هم یاره لی قلبه مرحمیدون
فوج اسرایه همدمیدون
ظلمات مخدراته هرشب
زینب گون اولوبدی سنده کوکب
هم غارت خیمه گاهی گوردون
هم گودی قتلگاهی گوردون
فردای شهادت حسینده
بیر غمده توکوبسن اشک دیده
وقتی اسرا بوروندی آهه
دوشدی یولی قانلی قتلگاهه
اول غصه خانم سنی قوجالتدی
محملدن اوزین کی زینب آتدی
سرعتله چوخور یره قاچوبدی
باشدان قره معجرین آچوبدی
داش قوملاری رد ایدوب اویردن
ویردی ایکی اللی باشه بیردن
عرض ایلدون ای عزیز زهرا
نه آختاروسان او داشلار آلتدا
فرمایش ایدوب یتیش هرایه
بیر قانلی بدن دوشوب ارایه
قان ایچره باجی بو نورعین دی
داش قوملارین آلتداکی حسین دی
چوخ عطرلیدی بو غم فضاسی
زهرا ننمون گلور صداسی
سسلور دوداقی یانان بالام وای
عطشان بالا غسلی قان بالام وای
منده دییرم کفنسیزیم وای
اللرده اولن حسینه لایلای
قویما اولا (آذرین )پریشان
درد دیلینه سن ایله درمان
- دوشنبه
- 29
- دی
- 1399
- ساعت
- 16:12
- نوشته شده توسط
- یوسف اکبری
- شاعر:
-
ودود آذرین خلخال
ارسال دیدگاه