بئله نازیله چوخ باخما منه مستانه مستانه
باخیشلان جان آلیرسان چون ، اله جانانه جانانه
یاناندا شمع رخسارون سوزنده یاش کیمی گوزدن
دولانام باشیوه منده یانام پروانه پروانه
باخورسان ناز و عشویلن سالورسان قلبیمی بنده
منی بنده چکوب گزمه بئله بیگانه بیگانه
بو خسته کونلومی ایله صفالی عشقوه خانه
کی بلکه آز گزیم جانا سنی کاشانه کاشانه
اوقدری دلربا سن کی بوقلب مست و میخارم
شراب وصلیوی دائم گزور میخانه میخانه
منی مست ایلیه بولمز شرابین استکانیله
منه وئر جام عشقونن دولی پیمانه پیمانه
خرابات اهیلیم سن سن منیم پیر خراباتیم
منی مست ایله ائل باخسین گزیم دیوانه دیوانه
قرض عرض ارادتدی کی هرگون سسلورم آدین
(پریشانه) اگر باخسان گزر شاهانه شاهانه
- پنج شنبه
- 2
- بهمن
- 1399
- ساعت
- 22:25
- نوشته شده توسط
- یوسف اکبری
- شاعر:
-
رامین محمد زاده
ارسال دیدگاه