«شایدده من ئولم گِئده سوز کربلایه سیز
امّا بو نوکرین سیزه بیر عرض حالی وار
پایین پاده سعی ائلیون چوخ دایانمیون
تز ردّ اولون ایاقوزون آلتدا یارالی وار»
شوقیله باش طرفده دورون باهم آغلیون
بالای سرده آغلاماقین آیری حالی وار
بیر سس سسه ویرون اوجادان یاحسین دیون
کیم آغلاسا رضاسی حق ذوالجلالی وار
عالم فدا او قبره که بیر شاه تشنه لب
بیر شیرخواره بیرده پیمبر مثالی وار
گویدن صدای وا وَلَدا گلسه سس ویرون
حتما آناسی فاطمه دور غم مقالی وار
اوردان دورون ایاقه گئدون نهر علقمه
نهر اوسته بیر یارالی یاتوب چوخ ملالی وار
عباسه بیر سلام ائلیون باشینه دونون
الله یانیندا بو آقانون چوخ جلالی وار
اما دیله رقیه نون آدین گتورمیون
سو وعده سی وئروب او قئزا انفعالی وار
آتدان دوشنده سسلدی قارداش هرایه گل
عباسی درک ایله که خیال وصالی وار
زهرا منه اوغول دیدی آرتیردی شأنیمی
فخر ایلورم که سینه ده زهرا مدالی وار
یوخدور الیم اگر چه دوتام دامنون نه غم
روحیم حسینچیدی سنیله اتّصالی وار
ای گون یوبانما ماه چخوب خط سیریدن
دار بقایه قارداشیوون انتقالی وار
بیرده قصوریم اولسا گذشت ایله سیّدی
اللرده دور یارالی باشیم قیل و قالی وار
ایله کرم بو صادقینی عفو قیل خدا
پرونده سینده گرچه گناه و وبالی وار
ائتدیم بو شعره منزوینون روحینی شریک
شاید دعای خیر ائده چوخ احتمالی وار
دو بیت اول این شعر از مرحوم منزوی بوده و بقیه شعر از حاج داود صادقی تبریزی میباشد
- پنج شنبه
- 9
- بهمن
- 1399
- ساعت
- 23:28
- نوشته شده توسط
- یوسف اکبری
- شاعر:
-
حاج داود صادقی تبریزی
ارسال دیدگاه