ای حسینی لَر حسینون آنلیُون مَنظُورینی
گُون کیمی باتدی اوُزی آرتُوردی دینون نُورینی
قَتلگاهِ کربلادَه آچدی دانشگاهِ دین
اوُلدی قربان دینِ حقّه اِیتدی قربانگاهِ دین
اِیتمیُون عادت یوزیله بَزمِ دین تشکیلینی
ایلیون جدّیّتیلَه باطلینن تَعطیلینی
تا جوانلار اِیلسون ناموس و دین تَحصیلینی
اِی حسینی لَر حسینون آنلیُون مَنظورینی
اوُرگشون ناموس و غِیرت درسینی اُستاد دَن
خلقه دین درسی وِیرن آل چَکمَسین اِرشاددن
عَبدِ صالح خدمتین دنیا چخارتماز یا ددَن
اِی حسینی لَر حسینون آنلیُون مَنظورینی
ایتمیُون غَفلت گیدوب اَگلشمِیُون بی اِعتنا
صاحِبِ دین و شَریعت بو اِیشه اوُلماز رضا
اِی جوانلار هر گُون عاشورادی هر یِر کربلا
اِی حسینی لَر حسینون آنلیُون مَنظورینی
روزِ عاشورادَه اِیتدی لَشکره بِیله خطاب
وارنَه علّت قَتلیمَه بو نُوعی اِیلورسُوز شتاب
روزِ مَحشر خالقه آیا واروزدُیور نه جَواب
اِی حسینی لَر حسینون آنلیُون مَنظورینی
اِیتدی فَرمایش که اِی صُوری مُسلمانلار بُیلون
من پِیمبَر اوُغلیم نا حَق منی ئولدورمِیون
مُومنم من بو کتاب اللّهیدی قرآن دور گُورون
اِی حسینی لَر حسینون آنلیُون مَنظورینی
اِیتدی فَرمایش که هاردا دینی بَد نام اِیتمیشَم
کُفره مایل اوُلموشام تُوهینِ اسلام اِیتمیشَم
دیندَه بدعَت قویمُوشام تَغییرِ اَحکام اِیتمیشَم
اِی حسینی لَر حسینون آنلیُون مَنظورینی
هر کیم اِسلامَه اِیدَه خدمت اوُلار مَنظورِ حَق
دینه تُوهین اِیلسَه هر کس او دور مَنفُورِ حَق
دین و قرآن و شَریعت نورِ حَق دور نورِ حَق
اِی حسینی لَر حسینون آنلیُون مَنظورینی
نُوریلَه ظلمت دَگُول زیبَندَه دوشا دوش اوُلا
عاقبت رُسوا اِیدَر حَق هر کسی حَق پُوش اوُلا
حَق وِیروب وَعده که قویماز نُورِ حَق خامُوش اوُلا
اِی حسینی لَر حسینون آنلیُون مَنظورینی
حَقّی گُورماخ قُدّرتی هر دیدهء حَق بیندَه دور
عزّت آختارسُوز اگر بُو مَذهَب و آئین دَه دور
آبرو عزّت شَرافت هر نه وار دور دِینده دور
اِی حسینی لَر حسینون آنلیُون مَنظورینی
اِی مُسلمانلار تَجاوز اِیتمیُون اَحکامیدَن
درسِ عِبرت اوُرگوشُون بو گردشِ اَیّامدَن
دِینوزی حِفظ اِیلیُون آل چَکمیُون اِسلامیدَن
اِی حسینی لَر حسینون آنلیُون مَنظورینی
#کهنموئی قُورتُولور عُمرون گِجَه گُوندوزلَرون
اوُلماسا عِبرت عَبث دور آغلاسا قان گُوزلَرون
یاز بُو اَشعاری قالا سَندنصُورا بُو سُوزلَرون
اِی حسینی لَر حسینون آنلیُون مَنظورینی
- یکشنبه
- 15
- مرداد
- 1402
- ساعت
- 13:57
- نوشته شده توسط
- یوسف اکبری
- شاعر:
-
مرحوم سیّد حسین کهنمویی
ارسال دیدگاه