اي ديـل اولمـا بئله بيگانه دئنن یا ابوالفضل
عاشق اول عشقينه مستانه دئنن يا ابوالفضل
اي اولان عشقيـده ديـوانه دئنن يا ابوالفضل
مشگلـون اولسـا ذليـلانه دئنن يا ابوالفضل
گتمـه هـش دكتره درمانه دئنن يا ابوالفضل
مرتضـا شيعـه سينـه سويلـه بو زيبا خبري
گتمـه دكتـرلـره داي آلمـاگونان نسخه لري
يوخدي تاثيري اينان اولسادا چوخ مختصري
نسخيـه باخمـاسا عبـاس اولارين يوخ اثري
چنگ وئر دامنه ايمانه دئنن يا ابوالفضل
چوخلي مفسـدلر الان درديني خناسه ديور
ولـي بعضـي لريـده دكتـره احساسه ديور
اودا بيـر نسخـه يازور قيمتين الماسه ديور
بـابـا دكتـرلـر اوزي دردينـي عباسه ديور
بوشلا دكترلري مردانه دئنن يا ابوالفضل
سنـده گل مشگلـون عباسه ده آسان اله سين
عشقينون جذبه سي تا دهريده طوفان اله سين
سنـي بيـر لطفلـه تـا نامـيه دوران اله سين
دردون اولسا دئگـونن درديوه درمان اله سين
آيريلوب دورما جداگانه دئنن يا ابوالفضل
آچيلوب شاه ولانين گينه ميخانه لري
آشنا سهليدي سسله گله بيگانه لري
چون دوا ايلوري هردرده عزا خانه لري
گلون اي كربوبلانين دَلـي ديوانه لري
سسلياخ تاكي غـريبانه ؛ دئنن يا ابوالفضل
ايندي اخلاصيله درمانه گلنللر گلسين
اورگي غصـه دن افغانه گلنللر گلسين
دئگـونن وادي احسانه گلنللر گلسين
داوا دكتردن الان جانه گلنللر گلسين
يالواراخ ساقي عطشانه دئنن يا ابوالفضل
دكتـري نسخه ني داروني اوتور اوز باشينا
شيشه جانيـوي چال عشقيله ماتم داشينا
آند ور قولسوز علمداري حسين قارداشينا
آغليـوب نوحه لره درديوي ده گوز ياشينا
رحم ائده ديده گريانه دئنن يا ابوالفضل
اي گلـن سينه سي زاره آقام عباسي چاغير
باغـلا تئز باشيـوه قاره ؛ آقام عباسي چاغير
ايسته سون درديوه چاره آقام عباسي چاغير
باخماسا ؛ سسله دوباره ؛ آقام عباسي چاغير
اولما مولاميزه بيگانه دئنن يا ابوالفضل
اورگشوب دست سرو جان آقام عباس آدينا
فخـر ائدور عالـم امـكان آقام عباس آدينا
مونس اولموش هامي دوران آقام عباس آدينا
يـازيلـوب كشـور ايـران آقام عباس آدينا
فخر اله كشور ايرانه دئنن يا ابوالفضل
نقدر كي آقامون عشقي بيزه شور وئرور
اوقـدر منـزلتـي شيعـه لره زور وئرور
كـرمينـن آقـاميـز قلبيلـره نور وئرور
شـايـدالان اوزوده بيزلره دستور وئرور
اولگونان شمعيمه پروانه دئنن يا ابوالفضل
ايسته سون نسخه يازا درديوه درمان آلاسان
يا كي لطف ايلييه شهپر وئره شهپر چالاسان
تاكي عمـرون بوئـي امنييتِ شهده قالاسان
ادبـون ايلـه رعـايت كي مداليـن سالاسان
تا كي باخسين سنه شاهانه دئنن يا ابوالفضل
گلـون اي اهـل عزا بيز اونا پروانه اولاخ
آقام عبـاسه گـوره راهي ميخانه اولاخ
شهد نابينن ايچاخ عاشق مستانه اولاخ
فاطمـه اوغلي باخا بيزلره ديوانه اولاخ
يوز قوياخ تا در سلطانه دئنن يا ابوالفضل
هانسي سلطان ؟؟ كي قالوب عرصه ميدانيده تك
تـك قـالان شـاهـه ائـدللر بلي تحليهده كمك
رسميـدن كـوفـه ليلـر چيخدي الهي نه دئمك ««اشاره به شعر مرحوم انور »»
دوغـريـوبـلار اوني عينـا فدكيـن مدركي تك
يان بو نسگيلده يانا يانه دئنن يا ابوالفضل
بيـر مصيبت يـازيـرام وار يـري افغانه گلم
مـرتضـا كينـه سينـه ائديللـر عباسـه ستم
گوزونـي اوخـلاديـلار قـولاريـدا اولدي قلم
قول قلم اولجاخ همين لنگـره دوشدي او علم
لعنت ايله بئله عدوانه دئنـن يا ابوالفضل
اي قلـم ياره لمـه تير سخـن له سينمي
درديـوي آل نظـره ياد اله مشك و علمي
يازمـا عباسـه نللـر ايلدي پيكان ستمي
يـازمـا گريـان المـه فاطمـه ذول كرمي
چك قلم غصلي عنوانه دئنن يا ابوالفضل
گرچه نيسگيلي يازيلديخجا اولور سوز زيبا
ولي سـو صحبتي اتمـه اوتانار چـون سقا
گوئيـا اينـدي ده علقمـده ديـور واويلا
اصغـريم يـاندي سوسوزدان خجلم يازهرا
اولا لعنت بئله دورانه دئنن يا ابوالفضل
بير سفارش ائدورم كاش وئرسوز ياخشي بها
چون سفارش اليـوبدور بو سـوزي زين العبا
اوني رد ايلميـون سيز بولون عطشان شهدا
عمـوم عباسي اوتانديرميـون اي اهل عزا
وئرميون اوت او لب عطشانه دئنن يا ابوالفضل
سعـي ائدون كي اوني سقـا آدينـا سسلميون
نيـه شرمنده اولوب ؟ مـدرك اونـا ايستميون
بـابـا شرمنـدليگـون علتينـي سـويلميون
لوتونون سينماقيني سعي اليوت چوخ دئميون
وئرما آتش دل سوزانه دئنن يا ابوالفضل
- پنج شنبه
- 9
- بهمن
- 1399
- ساعت
- 23:50
- نوشته شده توسط
- یوسف اکبری
- شاعر:
-
رامین محمد زاده
ارسال دیدگاه