به سبک (حسین جان گل علمدارون...)
اماندور تیز یتیش داده
قالوب یولدا گوزوم قارداش
سورونماقدان یوزوم اوسته
گیدوب یرده یوزوم قارداش
( برادر دلاوریم گل
بویاندی قانه پیکریم گل )
آلوب اطرافیمی اهلِ جفا قارداش امان ویرمز
سراسر پیکریم زخمِ سِناندور یاره سان ویرمز
جمالون گورمیونجه قارداشون جانانه جان ویرمز
وصالون ایستورم هجرانیوه یوخدور دوزوم قارداش
یارام چوخ دادخواهیم یوخ اوزوم یالقوز بو صحراده
اولوب جسمیم نشان تیغ و خدنگ قوم بیداده
شکارم بیر یارالی آهو تک اون یتدی صیّاده
منی قورتار بو زحمتدن سنه قربان اوزوم قارداش
نقدری ووردی یاره جسمیمه بو فرقه ی اعدا
رضا ویردیم سنون عشقونده من ای سرور بطحا
بو قدری ظلملر من بیکسه چوخ سهلدور امّا
نجه سن تک وفالی قارداشیمدان ال اوزوم قارداش
بو چولده صرصر ظلم اسدی عمریم گلشنی سولدی
باشیم سیندی، گوزوم جامی حسین جان قانیله دولدی
قولوم دوشدی، علم یاتدی، وجودیم غرق خون اولدی
بو دشت پر خطرده شامه دوندی گوندوزوم قارداش
عمامه ردّ اولوب باشدان باشیم قارداش آچوق قالدی
عمودیله ووروب نوفل منی آتدان یره سالدی
سراسر دوره می غیظیله دورت یوز نیزه دار آلدی
نفس باتدی اورکده قالدی چوخ گیزلین سوزوم قارداش
دوشنده صدر زین اوستن قضا بندی کمند اولدی
رکابین حلقه سینده بر ایاقیم قالدی بند اولدی
وجودیم قطعه قطعه ریزه ریزه بند بند اولدی
بوشالدی کاسه سرقانیله دولدی گوزوم قارداش
یخلدیم من عقاب اوستن فرح یوز ویردی اشراره
یارالی جسمیمی ایتدی خدنگ و نیزه صد پاره
وجودیم نقشه سی محو اولدی بسکه ووردولار یاره
نه نوعیله بو ظلم بی حسابه من دوزوم قارداش
یانور قلبون « حسینی » گرچه مقصودون زیارتدور
یازاندا پرده لی سوز یاز آچوق یازماق جسارتدور
آنان زهرا قبول ایتسه بو بیر بیتون کفایتدور
اماندور تیز یتیش داده قالوب یولدا گوزوم قارداش
- جمعه
- 10
- بهمن
- 1399
- ساعت
- 19:46
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه