ای رضـا ای شـاهـکار ذات رحمان السلام
ای رضـا ای معنـی آیـات قـران السلام
قبرون اولموش کربلای ملک ایران السلام
افتخـار ملـک ایـران و خـراسان السلام
شیعلر اولسون او زیبا قبره قربان السلام
سن مُنقلب اولموسان شمس الشموسه یا رضا
وئرموسن شأن و شـرافت ملک طوسه یا رضا
سـایه رحمت سـالـوب آدون رئـوسه یا رضا
قسمت ائت تاکی وئرام اُول قبره بوسه یا رضا
قبریوی توش ایلییم گر اولسا امکان السلام
آدیوه قربان اولوم کی افتخاریمسن آقا
عزت و حیثیت و شأن و وقاریمسن آقا
دائمی ذکر زبانیمسن ، شعاریمسن آقا
آند اولا زهـرایه کی دار و نداریمسن آقا
هم یاخینان سسلدیم ؛ همده اوزاخدان السلام
سگیـزیمجـی اختـر تابـان خلقتدور رضا
سر به سر لطف وعنایتدور کرامتدور رضا
روز محشـر بیـزلـره باب شفـاعتدور رضا
آنـدولا قـرانه کـی ایـرانه عـزتدور رضا
وار دلیلی گونده سسلر اهل ایران السلام
بیـزلـری سـالمـا گـوزونـن ای عـزیـز فاطمه
لطفیـوی شـامل الـه سـن بـول نَنـون بو حالیمه
دردیمـی سـن کی بـولورسن باخ اوزون احوالیمه
چـوخـدی دردیـم اوز الـونله دردلره وئر خاتیمه
چوخ عنایت ایلدون ائت بیرده احسان السلام
مُستَـفیـض پـرتـوِ انـوارین اولدوخ یا رضا
دیلـده یا حیـدر مدد انصارین اولدوخ یا رضا
چـوخ مصافتلر گلوب زوارین اولدوخ یا رضا
غملرون یاد ایلیوب غمخوارین اولدوخ یا رضا
اولموشوخ نیسگیللرونده دیده گریان السلام
السلام ای جـان زهـرا ، یـادگار مصطفا
السلام ای بـارگـاه اقـدسی دار و الشفا
شیعه نون دارو نداری قبروه اولسون فدا
یـاعلی موسی الـرضا وئر بیر برات کربلا
کربلا مشتـاقیـوخ ای جـان جانان السلام
- دوشنبه
- 13
- بهمن
- 1399
- ساعت
- 17:16
- نوشته شده توسط
- یوسف اکبری
- شاعر:
-
رامین محمد زاده
ارسال دیدگاه