حضرت صادقدن ایتدی بیر نفر راوی سوال
قصّه ی موت بتولی قیل بیان ای شهریار
پوزدی بو سوز حالینی، دولدی امامین گوزلری
گوز یاشین رخسارینه توکدی چو دُرّ شاهوار
بیر دویونجا آغلادی وا جَدَّتی ذکر ایلدی
سویلدی بو سرّی بُل لازمدی گرچه استتار
اُلمدی، پیغمبرین ریحانه سین اُلدوردولر
گیتدی دنیادن شهیده، عقل کلّه یادگار
عرض ایدوب صدّیقه ی کبرانی کیم ایتدی شهید
سویلدی ثانی آنام زهرانی قیلدی زخمدار
یاندوراندا درگهین بیر صدمه ووردی جدّه مه
باخمادی جسم لطیفینده ایدر اول صدمه کار
جسمینه اول گون یتن صدمیله دنیادن گیدوب
حیدر کرّاری قویدی داغ هجری بی قرار
غسلینی ویردی، کفن قیلدی، گئجِیله ایتدی دفن
حکمتاً گیزلتدی زهرا قبرینی اول شهسوار
عالِم علمِ لَدُنّی فکر صبحیله گئجه
ایلدی تعمیر او یرده بیر نچه تازه مزار
مرتضی گَلدی ایوه، صبح اولدی نشر اولدی خبر
دفن ایدوب صدّیقه ی کبرانی شاه تاجدار
دوشدی بو فکره آچا ثانی بتولین قبرینی
بیر جماعت مُلحِدینی سسلدی بو امره یار
اَلده حفر اسبابی جمع اولدی بقیعه مشرکین
بیر نفر بو امری ویردی شیر حقّه اختبار
باغلیوبدور بیر ساری دسمال او سرور باشینه
قویدی قبرستانه یوز شاهنشهِ گردون مدار
بوینونا ایتدی حمایل ذوالفقارین غیظیله
یتدی بیر قبر اوسته دوردی چکدی آه شعله بار
سسلدی گر بو قبوره بیر نفر وورسا اَلین
ذوالفقاریله گَتورّم روزگاریندن دَمار
شیر تک گوردی ولیُّ اللهی ثانی خشمناک
روبه مکّار تک آچدی زبان اعتذار
قصدیمیز توهین دگلدی دخت طه قبرینه
روح زهرایه بیزی عفو ایله میر بردبار
ای ولیّ ا... اعظم، شیر داور، یا علی
جسم عالمده قَوام جان و روح مستعار
دوزموسَن وورسون عدو قبر بتوله بیر کلنگ
ایستوسَن دنیا داغیلسون، قالماسون دار و دیار
قبر زهرانون داشی افضلدی یا جسم حسین
ذوالفقار اَلده ایدِیدون کربلایه بیر گذار
قویمیِیدون ایلیه آتلار حسینی پایمال
اولمیا اوراق گُل تک بیرده جسم زخمدار
آه او ساعتدن اُلن اُلدی، قالان اولدی اسیر
ابن سعد امر ایتدی چکدی بیر منادی بیله جار
وار یزیدین لشکریندن هر قَدَر مقتول اولان
دفن ایدون تا قالماسون گونلر ایوینده زینهار
شام و کوفه لشکریندن قالمادی یرده قالان
وار یری آخسون حسینی لر سرشکی همچو ثار
بیرده بیر فرمان ویروب سعد اوغلی یاغی لشکره
اشکیله زینب گوزین دولدوردی چون ابر بهار
هم حسینون لشکرین هم اوز یارالی پیکرین
ایلیون سُمّ خیولیله بو چولده خاکسار
چکدیلر شمشیر کین بو چولده حُرّین لشکری
سسلنوبلر ایتمروق اجرای امره اصطبار
سحق اولونسا جبریله اجسام انصار حسین
وار حسینون لشکرینده جسم حرّ نامدار
حرّ اولوب یاغی دوتاق ابن زیادین امرینه
لیک سردار سپه دور اوندا وار چوخ اعتبار
بیز باخاق حرّین وجودینده قوشون آت گَزدیره
دوزمَروق گورسون قبیله صاحبی چوخ انکسار
حرّین اقوامی یغشدی قبره قویدی جسمینی
قالماسون تا یرده قانلی پیکری زار و نزاز
وای کومک سیزلیق اَلیندن نه یاماندور ای خدا
بیر نفر مظلوم اُله اشرار اَلینده سوگوار
حرّین اولدی قوم و قارداشی یغشدی قویمادی
نعشی اوسته آت چاپا پامال ایده قوم نقار
هاردا قالموشدی بنی هاشم خدایا اوندا بس
اون نفر گَلدی ایده جسم حسینی خاکسار
بیر بدن که سینه سینده بَسلَمیشدی فاطمه
نانجیب آتلار اونون اعضاسین ایتدی انتشار
جلدیدن چخدی کلامُ ا...ِ ناطق جزء به جزء
قلب قرآن مبین اولدی بو غمدن داغدار
سحق ایدوب اسلام امامین آدلاری اسلامیان
وار یری گر ایلسه قرآنه انجیل افتخار
شمس اوج عزّت اوسته نقش بند اولدی هلال
بند بند اولدی یازولّار یرده عرشه گوشوار
اوخلانان قلب اوستونه لنگر سالوب سُمّ خیول
گرچه قیرمیشدی وتینی نوک تیر زهردار
کربلا توپراقی بی جا اولمیوب خاک شِفا
ایسلانوب تربت، حسین قانی آخوب چون چشمه سار
دورت آغاج صاقدان صولا صولدان صاقا، آت دیرناقی
نشر ایدوب اجزاسینی قان آخدی مثل جویبار
قان آخان یردن اولوب اون آلتی فرسخ حایری
ایمدیده مَامندی دورینده چکوب قانّی حصار
گُل گیاهیندن گَلور عطر حسینی برملا
آند اولا اوز جانینه قانی ایدوبدور لاله زار
اولمادی یالقوز حسینه بو جفا، هر بیر شهید
بو جفا و جوری گوردی هم کبار و هم صغار
- شنبه
- 18
- بهمن
- 1399
- ساعت
- 19:8
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه