سلام اولا ره حقده قدم وران خانما
ستم بسا طینه نقش عدم وران خانما
خرابه شامیده قاره علم وران خانما
گتوردی درده دل عالمی رقیه خانم
اوجاتدی قانه باتان پرچمی رقیه خانم
ای عاشقی که گلوبسن رقیه هیئتینه
سلام ایله شهدانین سفیر دولتینه
ادبله قوی یوزیوی آستان رحمتینه
بو بیر خانمدی که اوچ سنی واردی مین دردی
اونی حسین آقامیز هامیدان چوخ ایستردی
رقیه ماه بنی هاشمین ستاره سیدی
دوز عشقین سندی قلب پاره پاره سیدی
خانملیقندان علامت باشندا قاره سیدی
قیامتین گونی عشاقه تازه جان ویره جاق
قرا گینلری پیغمبره نشان ویره جاق
بو اوچ یاشندا خانم شامه ولوله سالدی
ئولنجه سنگر ایثاریده اویاق قالدی
یزیدی محکمیه چکدی انتقام آلدی
دوزی کیچیکدی ولیکن جلالی عظمادی
فروغ دیده زینب، سه ساله زهرادی
رقیه هر غمه دؤزدی اورک غمیله دولی
یخوبدی شمر و سنانین ایوین او باغلی قولی
مخالفنده اگر دوشسه شامه ایندی یولی
گورر که باغلیدی آل امیه نین قاپوسی
ولی آچخدی همیشه رقیه نون قاپوسی
امان او وقتیدن الله دوداقه جان گلدی
قرا گوزی یومولوب داده قدسیان گلدی
او ناگهانی ئولوم زینبه گران گلدی
دیدی اورکده اولان نسگله بی بون قربان
دانشموسان نیه شیرین دله بی بون قربان
واریدی نکته سنون هر سوزونده نازلی بالا
منیده پوزدون ئولنده ئوزونده نازلی بالا
گوزوم قالوب او یورولموش گوزونده نازلی بالا
یات ایندی دلده قالان سوزلره ئوزوم قربان
دویونجا یوخلامیان گوزلره گوزوم قربان
یزید باغلادی اهل مکارمین قاپوسین
گرکدی یاندرا آهیم او ظالمین قاپوسین
جنازه یرده عزیزیم دوگوم کیمین قاپوسین
خرابه یرده چیخان جانیوه بی بون قربان
قبار ایاقدان آخان قانیوه بی بون قربان
آنام جانی گوزلیم ئولدورر بو غصه منی
گوزون دولاندا گلوب ساربان دوگردی سنی
نجه یووار سنی، غساله گورسه بو بدنی
اورکده آهلاریوین مدّینه بی بون قربان
قولوندا قمچی لرین ردّینه بی بون قربان
- چهارشنبه
- 22
- بهمن
- 1399
- ساعت
- 20:25
- نوشته شده توسط
- یوسف اکبری
- شاعر:
-
ولی الله کلامی زنجانی
ارسال دیدگاه