نهضت عشقی حسین، زینبله برپا ایلدی
کربلانی وادی عشق و مصفّا ایلدی
وئردی یتمیش بیرگلی، عشقیله اوز دلدارینه
نیزه یاشینده اصول عشقی معنا ایلدی
گوردی زینب رأس معشوقی گزیر سرنیزه ده
عارفانه مأمن عشقه تماشا ایلدی
روز اوّل دفتری وئردی حسین دلدارینه
مُهر تایید ویردی زینب، آلتین امضا ایلدی
قوللاری باغلی دوشوب چولدن چوله، باخ عاشقه
فاطمی ذاتین خانم، دهره هویدا ایلدی
گر شهادتله حسین اسلامه اولدی پاسبان
بو اسارتله آخان قانلاری احیا ایلدی
کربلا مطلق قالاردی کربلاده بی گمان
کربلانی کربلا، اقدیس کبری ایلدی
فیصله عاشور تاپدی، اولدی سکاندار عشق
مرد و مردانه حسینون قانین ابقا ایلدی
بیر سوری اطفاله اولدی عشقیلن سرقافله
دوشمه دی هرگز ایاقدان، نقشین ایفا ایلدی
کوفه ده پوزدی ازل مرجانه نین پست اوغلونی
سیندیروب شخصیّتین، معلونی رسوا ایلدی
سسلدی ای شامیان من فاتح غم زینبم
نطق آتشباریله اسلامی احیا ایلدی
عاقبت سالدی یزیدی تختیدن دخت علی
عالمی مبهوت و حیران عشقِ زهرا ایلدی
ای«فقیر» غرق عصیان یاز به عشق پنج تن
بلکه ناموس خدا اشعارون امضا ایلدی
- دوشنبه
- 27
- بهمن
- 1399
- ساعت
- 20:28
- نوشته شده توسط
- یوسف اکبری
- شاعر:
-
مجید قلعه بیگی
ارسال دیدگاه