نقل ایلیوله جنگ جَملده گروه کین
قصد ایتدیلر خراب ایده لر دین حق ائوین
همراه اولوبدی طلحه، زبیریله عایشه
شیر خدانی اولدورلر باخ غلط ایشه
عثمانون آلدیلار اَله اول قانلی گوینگین
الده بهانه ایتدیلراول فرقه ی لعین
تحریک ایدوبله مکریله تا اهل بصره نی
فَتّاح خیبره ایده لر تنگ عرصه نی
هرقدر موعظه ایلدی شاه لافتی
جنگ ایتمیه امامیله لشکر مجاب اولا
اما قبول ایتمدی لشگر نصایحین
جنگی شروع ایدوبله او ابطال و مشرکین
شدت ایدوبدی جنگ و جدل رزمگاهیده
جولان ویروردی عایشه ده عرصه گاهیده
مینمیشدی بیر اوجا دویه عایشه اوگون
گویا بویوک بولوردی او کفاره چون اوزون
اول کشمکشده سبط نبی شاه ممتحن
زهرانین ارشد اوغلی عزیز دیلی حسن (ع)
حمله ایدوبدی لشگره حیدر آتاسی تک
حیران قالوب شجاعتینه اهل نُه فلک
بیر بیر وروب یخاردی یره قوم باطلی
اما اورکده قصد ایلیوب اصلی عاملی
چون بولدی گوز تیکوب دَویه فرقه ی دغل
هر نحویلن ده اولسا گرک پِیلنه جَمل
تکبیر دیلده حمله ایدوب قلب لشکر
گویا علیدی یورش ایدوب قوم کافره
موسا عصاسی تک قوشونی یاردی نیمه دن
گوستردی اوز صلابتینی حضرت حسن (ع)
دقت ایدون گورون آقامیز نینیدی اودم
ایتدی قیلینجیلان دوه نین قیچلارین قلم
گویا او ضربتیله وروب کفری ریشه دن
جنّتده فاطمه دیدی احسنت اوغول حسن (ع)
پیلندی تا جمل یتیشوب باشه غائله
گویا اودمده عایشه گلدی بئله دیله
سویلوب حسن ، بوایشی یاددان چخاتمارام
سندن تقاص آچینجا من آسوده یاتمارام
بیر گون اولار کی بو ایشیوه ایلرم عوض
بیر گون گرک نتیجه ویره دیلده کی غرض
ایلّلر دولاندی جُعده اولوب قاتل امام
مهمان گیدوبدی فاطمیه اول شه انام
غسل وکفن ایدوبله اوجسم شریفینه
قارداشلاری او گول بدنین آلدی چیگنینه
قصد ایتیدیلر رسول خدانین مزارینی
دفن ایلسونله زهریله سولموش عذارینی
مروان او دمده عایشیه تز ویروب خبر
بانو ایاقه دور اولوری زحمتون هدر
پیغمبرین یانندا حسن قویما دفن اولا
بو گون گرکدی قلب علی قانیله دولا
میندیردی مرکبه او خطاکار عورتی
دوشدی قباقه رسم ایلیه تازه بدعتی
سفیانیان کسوبله یولی ال عصمته
باخ قان توکن جماعته باخ بیر جنایته
شمشیر چکدیلر قویولوبدی کمانه اوخ
اول بی شرف جماعتین اصلا حیاسی یوخ
اوخلار هواده سیر ایلدی چار سمتیدن
بولمم بوروزگار خراب اولمادی ندن
زهرا بالاسی گوردی کی ایش دوشدی مشکله
قارداشینون وصیتینی سالدی فیکرینه
امر امام چون بویودی قان توکولمه سین
مشکل یارانسا آل علی جمله دینمه سین
یوز دوتدی هاشمی لره سلطان کربلا
سویلوب وصیتی کرگ ایندی ادا اولا
ناراحت ایتمیون آنامین نور دیده سین
حمل ایلیون بقیعه طرف گول جنازه سین
تابوتی تا بقیعه طرف ایتیدیلر روان
قویجاق یره نه گوردوله یا صاحب الزمان (عج)
اوخلار تیکوبدی آغ کفنی خسته پیکره
بیردن اوجالدی ناله لری عرش داوره
اوخشاردی هر اوخون یری بیر قرمزی گوله
قارداشی گورجاقین بیله گلدی اودم دیله
ظلم ایلیوبله قوم دنی ای اَخا سنه
غارت زده منم اولا جانیم فدا سنه
جاری اولوبدی خون دیلی دیده دن یره
بیر بیر او اوخلاری چکوب آتدی حسین یره
بیر دفعه کاش اولییدی بو اوخ چکماقین ایشی
ایکاش دورودن دوشیدی بیله چرخ گردیشی
اون ایل صورا بو منظره تکرار اولوب اونا
عبّاسی تاپدی قوملارین اوسته شه ولا
گوردی وروبلا سایسیز اوخی جسم پاکینه
قلبینده تازه لندی حسن غصه سی گینه
سسلندی ای بو چولده منیم یاوریم اویان
امداده گلمیشم منه قیل دردیوی بیان
دشمن گولر بو دمده منه ویرمه سن صدا
بو چولده سن اوزون بولوسن یالقوزام اخا
(بیکَس) قوتارعریضه وی تز ایتگیلن تمام
باشدان ایاقه نقصدی بو یازدیقون کلام
بانی اولوب بو شعروه بیر یار باوفا
بیر (جود منبعی) اوزی مداح باصفا
ایسته خدادن آل سعودی ایده ذلیل
باهم بقیعیده اولاسوز همره و دلیل
- پنج شنبه
- 21
- اسفند
- 1399
- ساعت
- 15:49
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه