ایل دولانوب باشلادی ماه عزا یاحسین
عالمه سن سالموسان شور نوا یاحسین
ای شه ارض و سما دردیمیزه قیل دوا
اهل عزا ایستوری کرب وبلا یاحسین
ای شرف عالمین، پنجم اهل کسا
زائر اولانلار دیور مرقدوی باصفا
ای اوگوزل قبروه جانیمیز اولسون فدا
عالم باطن دیور صحن وسرا یاحسین
بیرده چاغور اوردابیز سینه میزی داغلیاق
بین الحرمده آقا قول قولا تیز باغلیاق
اکبروه قاسمه سینه ووراق آغلیاق
هرایکیسندن آلاق درده دوا یاحسین
بیر اوجا یر اوردا وار تل دیوله اورا
زینب کبری آدی ویردی او تلله صفا
لطف ایله بو جمعیده تللیده باهم دورا
سسلیه ای وای آقاسینه وورا یاحسین
کیم گله صدقیله اول صحنیوه ایوانوه
سورته بیر عمری یوزون درگه احسانوه
دویماز آدوندان حسین آند اولا اوز جانوه
حشره کیمی سسله نه دلدن آقا یاحسین
کرب وبلا غملری اود سالار اکبادیمه
خامه دوتوب اود یانار ناله وفریادیمه
اکبروون یاره لی باشی دوشر یادیمه
مَنقَذ بی دین ایدوب گور نه جفا یاحسین
قاسم شهزاده نون جسمینی یاد ایلرم
سینّی کیچیک سروقد نعشینی یاد ایلرم
لشگرین آتلارینون نعلینی یاد ایلرم
آتلار ایاقی ایدوب جرم وخطا یاحسین
اوردااوجا بویلی بیر شیر شجاعت یاتوب
خیرداجا بیر قبرده کان شرافت یاتوب
سوگَتوره بولمه دی ایندی خجالت یاتوب
ای اوخجالت یاتان ماهه فدا یاحسین
صود امرین نسگلی قلبیمه آذر سالار
اوچ پراوخون صحبتی صبریمی الدن آلار
شاید آناسی گینه اصغره لایلای چالار
غنچه گلون گلشنه ویردی صفا یاحسین
مست می عشقیوم طایر پر بستیم
(بیکَس) و درماندیم عاصی و دلخستیم
آیری یره گیتمرم من سنه وابستیم
قووما بو درگاهیدن ایله عطا یا حسین
- پنج شنبه
- 21
- اسفند
- 1399
- ساعت
- 22:44
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه