چوخ باخوب اصغره یانما منی یاندرما حسین
اوخلی قربانیوی میدانی دولاندرما حسین
ایتمه غم اولمادی سو سولدی الونده گل یاس
گتور اکبر کیمی دوتسون آناسی اصغره یاس
باخوری اهل جفا اصغرون آز باغریوا باس
خیمه ده منتظری واردی یوباندورما حسین
شعله آهویله قلبیمی آز یاندور یاخ
غش ایدوبدور آناسی خیمه ده بیر شیونه باخ
بالاوون قانینی گل بو آغاران زلفیمه یاخ
آتما قانین گویه افلاکی بویاندرما حسین
سن او قانیله بویاندون منیده قوی بویانوم
گلمه سن گلم اوزوم اولما رضا چوخ دولانوم
قویموری قید محبت باجون اولسون دایان
.چکمه خجلت چکیلوب دوره ده یاندورما منی
نه چکور اصغر آناسی اونی بیر لیلی بولر
شیر خواره بالاسین گورمسه صاق قالماز ئولر
پوزقون احوالیوه باخدوقجا بو شام اهلی گولر
دردیوی گل منه دی دشمنه آندورما حسین
سوورم بیرده او غنچه گولی آغوشه آلام
باغلیام حلقینی گهواره سینه بیرده سالام
ساخلاما عرصه گه رزمیده یورقوندی بالام
اوز اوزون یورما مصیبتدن اوساندورما حسین
______________???__________
آفت باد خزان یوز ویروب اول غنچه گوله
قورخورام آغلیاسان شاد اولا شام اهلی گوله
گورورم ایستموسن بو غمی اطفال بوله
من ربابه دیرم سن اونا قاندورما حسین
یاتمیوب اوچ گیجه گوندوزدی زبس ایچمیوب آب
سو ویروب زهرلی پیکان ایلیوب ایمدیکه خواب
سو ایچوب اصغری فکر ایلوری بیچاره رباب
یوخلیوب، ساخلاما میداندا اویاندرما حسین
بولموری اهل حرم وضعینی قارداش ایشیگون
سو امیدیله چکور الده سو جامی کشیکون
خردا قیز لار دولانولار باشنا بوش بشیگون
آغلا ماقدان بالالار اولدی دایاندرما حسین
گه فرات اوسته باخورسان ایدوسن شور و نوا
چاقورورسان بالاوی آلسون ابوالفضلون اخا
الی یوخ قارداشون عباسین اونی سندن آلا
عذری واردور آتاسی حیدری یاندورما حسین
یانار احوالیوه بیگانه اگر گورسه سنی
آغلاسان آغلادوسان قارداش آنام فاطمه نی
غصه دن باتدی سسیم آغلاما آغلاتما منی
خانه صبریمی بو چولده تالاندورما حسین
یاحسین رفع ایت (حسینی)دن اوزون بو مرضی
بیر نگاهون اولی مین دکتر عالی عوضی
گوز یاشیدی بو سوزیمدن نچه نوکر غرضی
چوخ باخوب اکبره یانما منی یاندورما حسین
اوخلی قربانیوی میدانی دولاندورما حسین
- پنج شنبه
- 21
- اسفند
- 1399
- ساعت
- 23:8
- نوشته شده توسط
- یوسف اکبری
- شاعر:
-
سعدی زمان سیدرضا حسینی
ارسال دیدگاه