گَل باجی عطشان آپاردیم اصغری عطشان گتوردوم
اوخلی قربانین ربابه تازه دن مهمان گتوردوم
سو امیدیله بو طفلی خیمدن عطشان آپاردیم
اوز آناسیندان آیردیم بیر قوزی قربان آپاردیم
اللريم اوسته بالامی تحفهء جانان آپاردیم
عرض قیلدیم بار الها تحفهٔ ارزان گتوردوم
اولسا بیر بلبل چمنده گر گلِ رعنایه مأنوس
نیشِ خاری نوش ایدر ، نه شکوه ایلر نه بیر افسوس
ایستديم نمرودِ ثانی اولماسون بو چولده مأیوس
بير سوسوز ماهی نشانِ ناوکِ پیکان گتوردوم
تشنه حلقندن دگنده اوخ اوزی گَلدی امانه
دوز خدنگ ، افلاک قدّین اگدی دوندردی کمانه
قانینی اوجومدا دوتدم منده سپدیم آسمانه
سویلدیم یارب ختام ِخاتمِ پیمان گتوروم
قالميوب آهی بالامون چوخ گیدوب قان یاره سندن
گلماقا شرم ایلورم من مادر ِبیچاره سندن
اوندا که آتدی اوزینی اصغریم گهواره سندن
رمزیله آندوردی یعنی منده یاره جان گتوردوم
گوردی قوم اشقياده یوخدی آثارِ ترحّم
سو خیالین باشدان آتدی ایتمدی اصلا تكلّم
اوخ بوغازیندان دگنده ذوقدان ایتدی تبسّم
غنچه وش سولموش دوداقين گل کیمی خندان گتوردوم
بیر قالوردی بو نشانه گلستانیمدن گُلیمدن
گلشنیمدن ، بلبلمدن ، سوسنیمدن ، سونبلیمدن
اولمادی بیر کیمسه آلسون قانلی قنداقين اليمدن
لاعلاج اولدوم خیامه نعشنیی بو آن گتوردوم
قانلی قنداقین باسوب آغوشه میدانی دولاندیم
قصد ایدوب گلدیم آناسین منتظر گوردوم اوتاندیم
گه باخوب بو طفله یاندیم گاه گلدیم گه دایاندیم
رنجِ بسیاریله گلدیم سن دیمه آسان گتوردوم
ایستدیم یاريله يتسون عهد و پیمانیم ختامه
هر شهیدین پاره پاره نعشینی گَتدیم خیامه
گَل آنام باجی یورولما زحمتیم یتدی تمامه
آخرین بیر زحمتیمدور ، زحمته پایان گتوردوم
ویر خبر بیرده حرمده شیونِ دیگر قورولسون
آغلاسون اكبر آناسی ماتم ِاصغر قورولسون
خیمگاهیم حشره دونسون شورش ِمحشر قورولسون
اوخلی بیر محشوری شور ِمحشره اعلان گتوردوم
هی باخوب یانّام بو جامِ عشقدن مدهوشه زینب
من دانشدیرام دانشماز سن چاغور آغوشه زینب
گور چخوب روحی بدندن یا گیدوبدور هوشه زینب؟
هوشده اولسا اویاتما ، باخما من نالان گتوردوم
گللریم سولموشدی بیرجه گُل بوداقمده قالوردی
گلستانیمدن بو غنچه بیر سراغیمده قالوردی
فکریم آسوده دگلدی تا قوجاقیمده قالوردی
ایمدی ویردیم راحت اولدوم بیر ختمِ نقصان گتوردوم
تارِ زلف اکبریمده بیر تله بستیدی اصغر
ذوقِ وصليله او قدری آغليوب خستیدی اصغر
اوندا که من سندن آلدیم باجی جان اوستیدی اصغر
احتضاریله آپارديم ، محتضر قربان گتوردوم
بو زبانحالیمون واردور بو بیتینده معمّا
غیره فرض ایلر خطا اهلی ، بولر سوز دوزدی امّا
بیرده گُل گلشنده گولسه ایتمیوب انصاف اصلا
من عزا گلزارینون بو غنچه سین گریان گتوردوم
#شأنیم ای شاه ذیشان غرق ئدریای گناهم
زادِ عقبادن اليم بوش معصیتدن روسیاهم
ناامید ایتمه قاپوندان سن گورورسن بی پناهم
اصغره بیر نوحه یازدیم اکبره عنوان گتوردوم
- جمعه
- 5
- شهریور
- 1400
- ساعت
- 23:5
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه