فدا اولوم سنه من ای رسوله ریحانه
وفات ایستمه حقدن تلسمه هجرانه
بش اون گون عمریمه من سنله دلخوشام ، یوخسا
ازلدن اوخشیار عالم گوزومده زندانه
علی الخصوص او زماندان کی رحلت ایتدی رسول
بیله خیال ائلدیم عالم اولدی ویرانه
جهانی گوز یاشی تک سالمشام گوزومدن من
دویوبدی ایندی عم اوغلوندا سن کیمی جانه
ورم ایدوب اورگیم دردیمی بولن یوخدور
خدا بولور کی نجه باغریمی دونوب قانه
اقلی سن منه روحیه وئر بو اثناده
بیر آزدا گول یوزومه آغلاما یانا یانه
اولوم سوزون دلیوه جاری ایلمه تز تز
منی گتیرمه غمونده بو قدری افغانه
فلکده چوخ تلسور سالسون آیریلیق آریا
گوزی گوتورمدی باخدوقجا دور دورانه
قولومی باغلادی نامرده ویردی رشته سینی
علینی چکدیله ظلمیله عهد و پیمانه
سنه نه اولدی همان کشمکشده اولدی اوگون
اولار چکیردیله بیر یانه ، سنده بیر یانه
اوکشمکشده سنه فاطمه یانوب اورکیم
ئولوب دیریلدیم او صحنه یتونجه پایانه
جفای قنفذ او گوندن گوزومده جلوه لنور
ویرر عذاب اولونجه او صحنه وجدانه
سنی او همهمه سالدی عجب یامان درده
الیمده چاتمور اقلا دوا و درمانه
یامان گونومدی ، گیدور غمگساریمی الدن
قوروبدی غم قوشی قلبیمده غملی بیر لانه
گره گشایه غریبه گره سالوبدی فلک
یانوری سوز غمونده مثال پروانه
گوزوم باخا باخا دریای غمده غرق اولوسان
دوشوبدی کشتی عمرون غریبه طوفانه
قالوبدی نوح زمان بحر غمده سرگردان
دوتوبدی دامنیوی گور نجه غریبانه
عم اوغلووون سن اوزون دردینه علاج ایله
ترحم ایله من غمکش و پریشانه
یخلماقون منی دلدن سالار یقین ایله
مقاومت ایله غم لشکریله جانانه
منیم بو شهریده سندن صورا کیمیم واردور
اولوبدی اکثر امت منیله بیگانه
سلامیمی منیم حتی گلوب گیدن آلمور
گورن یوزون چوورور بولمورم نه عنوانه
سنون سلامیوه من دلخوشام بو عالمده
خدا نکرده سن اولسن علی دویار جانه
هامی غمیمده یانان فاطمه فقط سنسن
اولوم سوزون سالوب اود وئرماقلب سوزانه
عنایت ایلدی زهرا اوزی سنه (ساده )
دوباره خامه وی دوتدی رسوله دردانه
ثواب نوحه نه تنها سنونکیدور بلکه
گلوبدی (حیدری) سنله بو غمده افغانه
- پنج شنبه
- 21
- اسفند
- 1399
- ساعت
- 23:17
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه