آچگوزون ای منیم سر سپاهیم
قانلی چولده منیم دادخواهیم
سسلدون دادیوه گلمیشم دور
قوزانور عرشه افغان و آهیم
دور دوتمور دیلیم اویان
دور آرخام ایلیم اویان
دور سیندی بلیم اویان
سیندی بلیم اویان
کیم دییَردی منی سن آتِیدون
اشکیمی قانه قارداش قاتیدون
نچّه ایلده سنی گورمه میشدیم
من اولان یرده بیله یاتیدون
دور محشر اولوب عیان
دور یوخ طاقت بیان
دور دشمن گولور اویان
پاره پاره اولوبدی وجودون
رشته رشته اولوب تار و پودون
یولدا گوردوم قلم قوللاریوی
سالدی توپراقه خَصمِ عَنودون
دور قیل تکیه چگنیمه
دور باخ بیر بو حالیمه
دور رحم ایله اشکیمه
غم الینه اورک اودلانوبدی
حالیوه قلب زاریم یانوبدی
کیم روا گوردی بو ظلمی قارداش
وای منه صاق گوزون اوخلانوبدی
دور قان دولدی دیده وه
دور دیل یاندی ناله وه
دور حمل ایدیم خیمه وه
شرم قیلمور سنه ظلم ایدنلر
بو فراتین یولون سدّ ایدنلر
لشگر ایچره سنی تکلیوبلر
هم گلن لر ووروب هک گیدنلر
دور باشی بلالی سان
دور ائلدن آرالیسان
دور یاتما یارالیسان
(بیکَسم) دشت غمده بولورسن
تک قویوب سنده مندن دونورسن
قیزلارون سنسسن امّیدی قارداش
وای منه ایندی سنده ئولورسن
دور مقصوده ای چاتان
دور ای قارداشین آتان
دور ای قانینه باتان
- شنبه
- 23
- اسفند
- 1399
- ساعت
- 12:29
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه