باشیمی بو سون نفسیمده گل
آل اوزون کناره عم اوغلی جان
سنه آز زمان قوناقام چکور
اورگیم شراره عم اوغلی جان
ئولورم علی////گیدیرم علی
نچه خواهشیم وار حضوریوه
لطفیله اگر ایله سن قبول
اوّلاً بودور مرگ فاطمه
قویما خاطیرون ایله سین ملول
فرض ائله ازلدن یوخیدیم هیچ
، هیچ یارانمیوب دخترِ رسول
آغلاسان اوشاخلاردا آغلییر
رحم ائله بو زاره عم اوغلی جان
بو مدینه اهلی که باعثِ
بو جفائيله خَفَقاندیلار
نه خدادن ائتدیله بیر حیا
نه پیمبریندن اوتاندیلار
نه گناهیله منی دؤیدولر
سنون حقّیوی بئله داندیلار
سنون ائوده قالماقون اوت وورور
منِ بی قراره عم اوغلی جان
بولورم که واقف سرّیسن
اودی هر سوزی دئمدیم سنه
قیدنده کوچه ده روبرو
من اوگونکی چخدیم او دشمنه
صول الین آپاردی گویه او دم
ایلیوب جسارتی تا منه
دیمورم نه اولدی ولی قالوب
یرده گوشواره عم اوغلی جان
لحظات آخر عمردور
بولورم بو مطلبی من اوزوم
سنه چوخ سوزی دییه بولمدیم
بو اورکده قالدی منیم سوزوم
وئر اجازه معجریمی آچیم
ایله یاخجی گورموری صاق گوزوم
ولی شرطی وار دوزه سن گرک
باخاسان عذاره عم اوغلی جان
بو فراق اوتون که آلیشدیریب
ستمیله دشمنیوین اَلی
آییریر اجل بیزی حیف اولا
سنی تک قویوب گدیرم علی
گدیرم مزاریده دینجلم
سنه زحمتیم چوخ اولوب ولی
اوزووی بئله غمه سالما چوخ
داخی یوخدی چاره عم اوغلی جان
خسته جسمیمین دفن و کفنینی
نصف شب اوزون ایله جا به جا
لیک غسل ائدنده اجازه ویر
کهنه کوینییم جسمیده قالا
قورخورام سنی آغلادا علی
پیکریمده کی گوینیین یارا
قبریدن آپاررام شکایتون
محضر نگاره عم اوغلی جان
نازینی اؤزون چک بو قیزلارون
قویما گوزلری اشگیله دولا
کوچه ده او گون قوخدی چون حسن
قویما عارضی گول کیمی سولا
وار حسینیمه بیر مسافرت
وای او گونکی بوردان دوشر یولا
نصف شب پریشان بالالارین
باغلییر قطاره عم اوغلی جان
من نجه شهید اولدی محسونوم
یانمیشام شرار جفائیله
بو حسین ولی امتحان ویرر
بیر سوسوز قالان شیرخواریله
سو یرینه قان ایچدیرر اونا
حرمله او گون جور خاریله
(بیکَس) اوغلوم اوندا گزر چولی
الده شیرخواره عم اوغلی جان
- دوشنبه
- 25
- اسفند
- 1399
- ساعت
- 11:55
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه