عرش اهلی نغمه خواندی گینه بولمورم نَدن
بیت ولایه واردی گینه چوخ گلوب گیدن
ثاراللهین ایوینده بوگون شور حشری وار
چوخلی ملک لرین او ایوه حَشرو نَشری وار
الله دوباره سویگولونه ایلیوب عطا
بیر قیز کی عالمینه ویرر گول یوزی صفا
قدرت الیله خلق ایلیوب حیّ لا یزال
بیر نازدانه ،سویمه لی بیر مَه جبین غزال
هرکیم باخیر جمالینه زهرانی یاد ایدیر
مجنون کیمی دوشور چوله لیلانی یاد ایدیر
قاش گوز قرا ،جمالی وروور طعنه کوکبه
اوخشور یوزی بتوله ،قرا زلفی زینبه
آغوشینه آلوبدی اودم شاه ماسوا
اوپدی یوزوندن ایلدی هم خالقه ثنا
عرض ایلدی خدا ، نه دل آرا یاراتمیسان
باشدان ایاقه مظهر زهرا یاراتمیسان
بوندانصورا دوشنده آنام یادیمه منیم
باخسام جمالینه قیزیمین قالماز هیچ غمیم
زینب آلوب قوجاقینه ایتدی بیله ندا
ای ماه منظریم ،سنه عمّه ن اولا فدا
لطف ایلیوب خدای جهان نور عینیمه
اللهه شکر اولا سنی ویردی حسینیمه
زهرا آنامی نچّه ایل اولدی گورنمورم
علّت اودور باخاندا سنه من دوننمورم
رنجور قلبیمه ولی بیر همهمه گلوب
فکر ایلورم دوباره آنام فاطمه گلوب
بولمم ندن باخاندا سنه گوزلریم دولور
بی اختیار اشکیم آخیر بولمورم نولور
شاید حسین ،ویردی خبر آغلاما باجی
واردور دلیلی سینه وی سن داغلاما باجی
هرچند حقلیسن بالاما سینه داغلاسان
بیر سَرنوشتی وار،دییه بولسم چوخ آغلاسان
مونس اولار زمانه ده چوخلی مصیبته
زهرا آنام کیمی دوشه جاق رنج و محنته
آز عمروده ،جمالی باجی غنچه تک سولار
سنله رقیّه عازم کرب وبلا اولار
شرکت ایدر سنیله باجی داغ اکبره
الله بولور نجه باخاجاق حلق اصغره
عبّاسیمی یخاندا قوشون ،قلبی داغلانار
آخر طناب ظلموله قوللاری باغلانار
شامین یولوندا پایِ پیاده گیدر باجی
یوللاردا شمر دون اونی چوخ اینجیدر باجی
سن باخما بو قیزی حرم اهلی سویَر باجی
شامه یتینجه زَجر اونی امّا دویَر باجی
ایندی سنون قوجاقیوه ناز ایلیین اوشاق
کُنج خرابیه اولاجاق نچّه گون قوناق
گوزده سرشکینی اودی قانه قاتار باجی
ویرانه یرده نچّه گجه آج یاتار باجی
سندن منی گر ایستسه بو مونس محن
ویرانیه باجی گَلَرم ،بیر طَبَقده من
درد وبلاسی قلبیمی دائم سیخار باجی
گورسه یارالی باشیمی جانی چخار باجی
(بیکَس) اماندی ویرمه ادامه قلم یانور
اَز بس آغیردی محنتی گوروسن دفتر اودلانور
- جمعه
- 29
- اسفند
- 1399
- ساعت
- 21:12
- نوشته شده توسط
- یوسف اکبری
- شاعر:
-
مهدی عبادی(بیکس)
ارسال دیدگاه