گوزلر هامی یوللاردا دولوب شوقیله کیهان
گونلری سپری اولدی گلوب سوّم شعبان
خلق ائتدی خدا عشقینه بیر کَفّه ی میزان
مصباح هدایت ائلدی دهری درخشان
سلطان هدی گلدی ائده کونی مقلّد
پیغمبر عشق اولدی دوباره متولد
سلطان نئجه سلطان بورویوب نوری جهانی
یازدی آدینا ذات خدا باغ جنانی
احمد ئوزی نشر ائتدی گولاقینده اذانی
حلقوندن اوپوب وئردی اونا عشق نشانی
تعظیمه سالوب ما خَلَقی شاه ولایت
طاها ده ملکلر تک ائدوب اوندان اطاعت
بیر گُل دی حسین،فصل شهادت باهاریننان
بیر نسخۀ جان آلمیش او پروردیگاریننان
تلفیق ائدوب الله قانینی ئوز نِگاریننان
عشق خنجرینی ووردی محبت داماریننان
بیر قطره آخیب،گوردی همان قطره حسیندی
قانیله تجلّا ائلین سِتره حسیندی
الفاظ محبت دی تاپار عشقیده معنا
بیر تکجه حسین ائتسه ائدر سِرّینی گویا
سر دفتر عشقه چوخ اولار یعنی الفبا
قربان اولوم اربابیمه هم((ها))ئیدی هم((یاء))
چون تارک عرفانه یئتن آخر حسیندی
عالم دولی عاشق اولا گر محشر حسیندی
عشق آیه سینه اولدی حسینون دیلی آماج
دنیا بئله پیغمبره محتاجیدی محتاج
طاها بیر عروج ائتدی اولا دینینه منهاج
اما ایکی دوران دا حسین ایلدی معراج
جبریل پَرینده بیری، دونیایه گَلنده
بیرده که جدا اوسته باشی شامه گئدنده
وار کیمده بو اندازه وقاریله فضیلت
منن دی حسینیم بویوروب ختم رسالت
زهرا اونا قربان دئدی هم شاه عدالت
اوچ مهره ی خلقت اوخویوب شأنینه مدحت
اوچ هور فروزاننان آلوب نیک خصالی
حدّ کرمی سیندیروب اجلال و کمالی
نوریدور حسین مین بئله خورشیده برابر
مصباحیدی بیر جلوه سی مین جلوه یه برتر
خورشید کسوف ائتسه اولار نوری مکدّر
مصباح قارانلیقدا ولی تابشون ایلر
اَلدن یاپیشان یعنی خطاکاره حسیندی
آماده ائدن جانلاری ایثاره حسیندی
شیدای حسین،حقّ یولوندا گوتورر گام
اردوی حسینوندی فقط آخر و فرجام
فکر ائتمه که امّت آرا قالمیش آدی گمنام
مرهونیدی ایندی ده حسین قانینه اسلام
دین روحینی ابقا ائلین قان دا حسیندی
احکامیده،ایمانیده،قرآن دا حسیندی
واله دی بشر شاهیده که فرّ و جلاله
سیغماز بو قدر لطف و عطا وهم و خیاله
بیر مصرعی آخر ائدورم شاه حواله
زهرا چمنونده آچیلان قیرمیزی لاله
عاجز قالان اوصافینه ترکیب و غزل دی
بیر سؤز یازارام عشق حسینیله گؤزل دی
- دوشنبه
- 2
- فروردین
- 1400
- ساعت
- 23:11
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه