منم ساجد که دشت کربلاده
عدودن ظلم بی پایانی گوردوم
شقی لردن خیامین غارتینده
ئورکلر داغلیان نیرانی گؤردوم
ربابین اللری دؤشده قالان دا
او لحظه آخرِ دونیانی گؤردوم
ئولن دریا کنارینده بیر عطشان
آخان صحرا لره دریانی گؤردوم
یانان ساعت ده نمرود آتشــینده
خلیلیم زینب کبرانی گؤردوم
اوتوزمین نیزه و خنجر هواده
هدف ده بیر تن عریانی گؤردوم
علی آد دا اولانـــلار ئولدورولدو
طـنـابــی دوریمه زندانی گؤردوم
قولوم باغلی یئتیردیم شهر شامه
بو یولدا غـصـّـۀ عـُـظمانی گؤردوم
یاراتدیم من قیامه موج دیگر
دالیندان عمّـه می طوفانی گؤردوم
خرابه منزلین آلام و دردین
همیشه دیدۀ گریانی گؤردوم
منم زین العبای آل طاها
که عمق ماتم و افغانی گؤردوم
اگر گؤرسم که قربانلیق کسورلر
که گویا ذبح اولان عطشانی گؤردوم
جنایت صحنه سی گئتمز گؤزومدن
نوالی روضه آیریلماز سؤزومدن
- سه شنبه
- 3
- فروردین
- 1400
- ساعت
- 14:31
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه