لجه ی طبعیم گئنه موج آختارور
سیره چیخوب معنیِ اوج آختارور
عشق مجازی نی چوله آتمیشام
چوخ گئجه لر فکریده من یاتمیشام
عشق نئدور کیم بونو تفسیر ائدوب
هانسی لاری عشق یولوننان گئدوب
گئلدی بو سؤز قلبی عبث داغلاما
بو گذرا عالمه بئل باغلاما
آختاروسان عشقی اگر عاشق اول
عهدیوه پیمانیوه سن صادق اول
کرببلا دفترینه قیل نظر
عشق خطیلن یازیلوب صفحه لر
باشدا یازوب بسم بـِـرَّب الحُسین
عشق فقط معنیِ حـُـب الحُسین
عشقی دئمه لیلی و مجنون بیلر
شاه حظورینده بولار کیمدی لر
قانلا حسین مطلبی تحریر ائدوب
حقّی دوتوب باطلی تکفیر ائدوب
شیعه اگر عاشق مستانه سن
دقّت ائله آیه قرآنه سن
عشق گوزویلن اوخی هر سوره نی
واقعه و تین و یا جمعه نی
آلتی مین آیه ،هره سی بیر یارا
جانینه نقش ائتدی حسین، حفظ اولا
علت اودور جانیدی قرآن دینه
عاشق اولان عالم اولار رمزینه
قرآنی عشق ایلسه معنا حسین
نقطه به نقطه یازیلوب یا حسین
وئردی حسین اوز قیزینا درسی تا
شیر بجرده ائده محشر بپا
اوز قیزی قرآن یاراسین حفظ ائدوب
شأن و مقامِ آتاسین حفظ ائدوب
اوچ ایلین عرضینده ئورک قان اولوب
عارف دین حافظ قرآن اولوب
اولدی هر عاشق تک اسیر حسین
منتقم و یار و سفیر حسین
نهضت زینب ده اولوب نقشی چوخ
سوزلری الله سوزودی، شکّ یوخ
ئورگدوب عالمده رقیه بیزه
شیعه اودور راه بلاده دؤزه
اوچ یاشی وار سانما اوشاقدی بو قیز
مکتب اسلامه دایاقدی بو قیز
فلسفه و عشق و خطردن دییر
نطقینه مین مجتهد احسن دییر
گوزلری زهرا گؤزونه بنزیور
حربه سی حیدر سؤزونه بنزیور
قدرتی زینبدن آلیبدور ،تانی
شاه دامارینده وار ابالفضل قانی
یعنی رقیه گِل احساس اولار
غیرتی ده غیرت عباس اولار
باغلانوب عشق عالمی ده قول قولا
زینبیلن دوشدی رقیه یولا
زینب و زهرایِ سه ساله اولا
امر محالیدی که دشمن قالا
خصمه غرض سالدی رقیه خانم
کوفه نی ده آلدی رقیه خانم
بیرده یایوب عالمه ثاراللهّی
سوزلری تیترتدی عـُـبیداللهّی
ائتدی خطاب ای آناسی نابـِکار
روبـَـهه آهو اولا بیلمز شکار
راحت اولوب چوخ ائلمه فکر خام
گلمیشم عمّه م له آلام انتقام
ظلمیله قان ایچمگه بی باک سوز
نطفه ده واضح دی کی ناپاک سوز
سویله اگر وارسا آتاندان بیر آد
هامّی بیلور سن سن او ابن زیاد
من بابامین یئرده کی شمشیریم
دخت حسینم علوی شیریم
من دیلیَم اکبریله قاسمون
شعله سیم شمع بنی هاشمون
جهد و تلاشیم شرف دینه دی
آنلا رقیه نئدی قورخو نئدی
گر ایاقیم ردّ اولا خار اوستونه
قمچی دگه بی کس و زار اوستونه
من بابامین یاره سیم سؤنمرم
اوز هدفیمدن ده ئولم دونمرم
چکدی فلک ظلمیله شامه اونی
گئتدی گئنه عشقی قیامه اونی
خارجی اولدی نظر عامیده
یوخ دئدی عیبی آلارام شامیده
شهریده ویرانه نشین اولدولار
قاره بولوت تک غمیلن دولدولار
بیر گئجه کی ظلمیدی ظلمت ایزی
گئلدی جلالیه یزیدون قیزی
ایستدی تحقیر ائده شاه اولدوزون
نقشه بر عکس اولدی ایتیردی اوزون
دوردی ایاقه او شمیم وصال
تاپدی رقیه گئنه بیر شور و حال
رخصتی زینبدن آلوب باشلادی
نطقیله شیطان قیزینی داشلادی
سسلدی فخریله رقیه منم
واهمه ی آل امیه منم
زینب و سجاد عزیزیم منیم
حور و ملکلردی کنیزیم منیم
من گرک ایثاریمه فخر ایلییم
زینبه تای یاریمه فخر ایلییم
واردی حسینیم کیمی شاهیم منیم
جلوه ی عباسیدی ماهیم منیم
حضرت زهرادی منیم مادریم
جان منه سسلردی علی اکبریم
معاویه ده حیدره تعظیم ائدوب
جنگیده اوز جانینی تسلیم ائدوب
سن که آتون گونده قمار ایلییور
مست گزوب عقلی خمار ایلییور
سن که آتون حیوانا وار اُلفتی
رتبه ی حیواندی ائله حرمتی
اللها کفران ائلیور هر زمان
جوریله طغیان ائلیور هر زمان
عین نجاستدی یزیدون اوزی
فخر ائلمز بـِیله شقی نون قیزی
شاه قیزی،والا نسبم ای پلید
شرمیدن ئول سن که آتوندی یزید
- سه شنبه
- 3
- فروردین
- 1400
- ساعت
- 17:16
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه