چمن عشق و وفانین،آچیلوب فصل بهاری
عرشیدن فرشه ملائک،سوپوروب مقدم یاری
خانهٔ وحی وئریبدی،گویون اولدوزلاری زینت
سئوینیب حضرت زهرا،دوغولان وقتده نگاری
خالقین احساسینه حیرانم-حیرانم
دولدی بو احساسیله پیمانم-پیمانم
یازدی حسین آدینی نوریله-گویلرده
منده اونون آدینه قربانم-قربانم
عالم و خلدِ برینی،دوتوب آواسی حسینون
سالوب آفاقه شراره،رٌخِ سیماسی حسینون
جنتی باشیدن آتدی،بئله لعیاسی حسینون
گؤرمقه فاطمه عشقین،قالمادی ذرّه قراری
حسرت اونون عشقینه دنیادی-دنیادی
چون دل و روحیّه ی زهرادی-زهرادی
من تک ازل دن هامی اول شاهه-نوکردی
شاهیمیز عالملره مولادی-مولادی
ای صبا مژده‌می گؤندر،ملکوتیله جنانه
منزل حیدره هامّی،اولالار جشنه روانه
عیدیانه وئریب الله،عشقینی کل جهانه
که هدایتگری اولسون،هامینی کوثره ساری
محو تماشاسیدی حورالر-حورالر
مریم و لعیائیله سارالر-سارالر
رحمت سرشاری دوتوب کونِ-امکانی
اَگدی باشین لطفینه دریالر-دریالر
پسر حضرت زهرا،شرف آل عبادی
یوزی خورشیده مَثَل دی،ألی هر درده دوادی
قاشی مهتابه بزک دی،گؤزی دریای سخادی
ائله گوهردی وجودی،محکه یوخدی عیاری
خلق ائدوب الله اونی عقبایه-سرمایه
عشقی وئریب عزتی موسایه-عیسایه
سینه‌سی آئینه ی قرآندی-ایماندی
وحی اوخویار شأنینه مین آیه-طاهایه
- چهارشنبه
- 4
- فروردین
- 1400
- ساعت
- 20:18
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه