تا اِیشیتدی شَه دین نایِ نی دلداری
قوملارین اوسته سورندی اِیده یاری، یاری
باخمادی قتلگهین اِیلوب احاطه اوخلار
جسمینی پارچالادی نیزه و اوخلار خاری
بیر خدا بولدی نه حاله گل زهرا قالدی
یارالار ایلدیلر چشمه کیمی قان جاری
باجیسی گلدی دیله سَسلدی قارداش گَلمه
روحیمه ویرمه بو رفتاریویله آزاری
منیده درک ایله بو موقع حساسیمده
سورنوب قوملارین اوستون ایلمه گلناری
چوخدا قالما باجیوین قیدینه بو صحراده
اوزیوین قیدیوه قال، سون نفسینده باری
ممکنی چوخدی آنام شام غریبانه گَله
وای منه سالسا یولون کرب و بلایه ساری
آیری احواله قالار گورسه سورنماق اثرین
اِیلمه زینبه خاطر بیله بیر ایثاری
کاش طوفان گله رَدین اِیتیره بو فعلین
قالمیا قوملارین اوستونده همین آثاری
بولسه گر ایسی قوم اوسته سورنوبسن قارداش
اوندا آرتوق پوزولار فاطمه نین افکاری
آغاران زلفین آچوب آلسا اَله مقتلده
آغلیوب آغلاداجاخ زخم در و دیواری
باجیوین باغرینی قان اِیتدی هله رفتارون
اِیتمییدون منیله کاش بیله رفتاری
اربعینونده گلوب منده سورونم سن تک
عشقیمون دلده سنه گورسنه تا معیاری
(انورین) روحینه هدیه اِیله بو شعری (عتیق)
او چکوب نظمه ازلده بو غم دشواری
- یکشنبه
- 3
- مرداد
- 1400
- ساعت
- 16:34
- نوشته شده توسط
- یوسف اکبری
- شاعر:
-
استاد داود طهمورثی
ارسال دیدگاه