کربلایه دوشوب الله گذریم - بودور آخر سفریم
بو نه گلشن دی صولوب غنچه‌لریم - بودور آخر سفریم
یوخدی بو دشتیده غربت قوخوسی-بورا موطن‌دی منه
گؤردوغوم لحظه ملالیم آزالیر-مثلِ مسکن‌دی منه
تلّین آلتیندا یارانمیش بو چوخور-یئری مدفن‌دی منه
قویلانار توپراقینا هر گُهریم - بودور آخر سفریم
چیرپینان سینه‌ده یوللار اوزونی-راحت اولدی ئورگیم
دئمرم منظره‌سیندن سیخیلوب-نه دوتولدی ئورگیم
سو گؤرنده ولی بیلمم نه ایچون- غمه دولدی ئورگیم
آتشیندن بئله یاندی جگریم - بودور آخر سفریم
عالم ذرّیده گؤرموش بو چولی-بیلوری رازین حسین
بو مقّدس یئره ائتمیش او سبب-عشقین ابرازین حسین
گئتیروب فدیه سنین مقدمویه-عمده سربازین حسین
قاسمیم،اکبریله صود امریم - بودور آخر سفریم
نامه‌ی عشقینه هر بیر کَسیمون-مُهر ماتم دوشجک
باجیمون،قارداشیمون،عائله‌مین-پایینا غم دوشجک
خیردا قیزلاریم عداوت گؤرجک-اودا باهم دوشجک
واردی هر ایشدن ازلدن خبریم - بودور آخر سفریم
منه گَلسه بو بیاباندا اگر-هر مشقّت دؤزَرَم
گول چیچک اولماسا اؤز عشقیمیلن-بو یئره گول دوزرم
بو گلستانی بهشت‌دن ده گؤزل-قانیمیلن بئزرم
گئتمییور جنّته حتی نظریم - بودور آخر سفریم
کیم منیلن بورادا مُحرم اولا-فخر ائدر مین حاجیا
یئدّی قارداش وئره‌جک غیرتیلن-بوردا قوج بیر باجیا
ای خدا راضیم اسلام اوجالا-ولی قلبیم آجیا
زهره ده دؤنسه دیلیم‌ده شَکریم - بودور آخر سفریم
من فنا اولماقا گؤرستمیشیدیم-ای خدا رغبتیمی
لطفیله سنده مقدّر ائله‌دین-بو یئره قسمتیمی
بو قیزیل توپراقین اوسته چکرم-نقشِ حرّیتیمی
حشر اولونجا قالا یئرده اثریم - بودور آخر سفریم
اَلده خنجر منه آماده دوروب-دشمنِ شوم اولَجم
عالمین آخری ای کرب‌وبلا-اولدی معلوم اولَجم
قان دوتان طالعیمین هر یازیسی-بودی مظلوم اولَجم
دیللری یاندیراجاقدور شرریم - بودور آخر سفریم
کربلا سنده ستم شعله‌لری-خاکیدن معراجادی
نَقدر اولسا صفا سنده گئنه-غمون اوننان اوجادی
آچمیوب دیل هله هئچ بیر شهیدون-بیر شهیدون قوجادی
فوجِ غمدن بو اولا مختصریم - بودور آخر سفریم
فقط الله بیلیر عورت اوشاقیم-نه ملاله دوشجک
اوندا کی سنده آخان قانلاریلان-آیا هاله دوشجک
اوجا بوی. قارداشیمون گول بدنی-نجه حاله دوشجک
توپراقا یوز قویاجاقدور قمریم - بودور آخر سفریم
امّته شاهدیم الله‌دی نه زور-نه ده جبر ایسته‌میشم
بو فنا جانه بو یئردن نه کفن-نه ده قبر ایسته‌میشم
باجیمون قلب وفادارینه من-ولی صبر ایسته‌میشم
اولموین جانلارا اولسون سپریم - بودور آخر سفریم
ائده‌جک داشلار اصابت ستمِ-اشقیادن باشیما
ائتمرم شِکوه نه اول خنجردن-نه جدادن باشیما
چون بلی سویله‌میشم هر نه گله-اقتضادن باشیما
من حسینم بودا شیرین قَدَریم - بودور آخر سفریم
اولاجاق گون توسل ائده‌جک-هر مسلمان بو یئره
حاجتین آلماقا زائر گله‌جک-اهل ایمان بو یئره
چون سفارش خود مولا ائله‌ییب-لبی عطشان بو یئره
اَلی بوش قویما گئده بیر نفریم - بودور آخر سفریم
محترم شیعه‌‌یه‌دی بارگهون-چوخ مقدس‌دی آقا
آیری مسکن سنون عاشقلریوه-سانکی محبس‌دی آقا
باخاسان گوش نگاهونله منه-بیر عومور بسدی آقا
سسله‌سن آدیمی بیر یول نوکریم - بودور آخر سفریم
- چهارشنبه
- 4
- فروردین
- 1400
- ساعت
- 22:15
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه