یارالی جان وئرن زهرا شفا گورسیدی ئولمزدی
غریبیدی وطن ده آشنا گورسیدی ئولمزدی
او زهرا کی اونون دنیا سیغاردی جام صبرینده
ئولوب سیز بی‌مروّت ملتین جوریله جبرینده
اولون راحت آنام ساکت یاتیبدی ایندی قبرینده
دیین‌ده حقّینی بیر هم‌صدا گورسیدی ئولمزدی
یوموبدور فاطمه گؤز بو وطن‌دن ناامیدانه
نگین حضرت احمد تانیندی خلقه بیگانه
اونی غربت ملالی سالدی مین اندوه و هجرانه
یقیناً سیز جماعتدن وفا گورسیدی ئولمزدی
سلامین بلکه آلسیدوز دئمزدیم من ننم ئولدی
یئره شمشیری سالسیدوز دئمزدیم من ننم ئولدی
اولان عهد اوسته قالسیدوز دئمزدیم من ننم ئولدی
سیزی بند جهالتدن رها گورسیدی ئولمزدی
بو دهر بیکراندا تاپمادی زهرا بیر آرامش
سیز ائتدوقجه اونا کم لطف‌لیق اِیلوردی او سازش
نه حرمت ساخلادوز دلبند طاهایه نه ده ارزش
وجود و شأنینه لایق بها گورسیدی ئولمزدی
فدک کی فاطمه گزدی اونون بی منّت اوستونده
نه علت اِیله‌دوز محکوم اونی ملکیّت اوستونده
جنایتدن اولوب آخر شهید حریّت اوستونده
بجای خیزران صلح و صفا گورسیدی ئولمزدی
اولونجه اولمادی سیزدن دل زهرا رضایتمند
ولایت شاهینه خاطر وئریب جانین شرافتمند
آپاردی قبره همراهینده بیر خلد آشیان فرزند
اولان ظلمی وجودینده روا گورسیدی ئولمزدی
یاشی آز اولسادا غم عالمی دریائیدی زهرا
قسم آل عبایه، حیدره دنیائیدی زهرا
هوادار علی‌ئیدی، ولی تنهائیدی زهرا
علی راهینده آیری جانفدا گورسیدی ئولمزدی
دوراندا پشت حیدرده شبیه کوهیدی جسمی
ولی رنج و مصیبتدن اونون انبوهیدی جسمی
او سیلی ماجراسیندن صورا مجروحیدی جسمی
و اِلّا اوننان آیری ماجرا گورسیدی ئولمزدی
گوروم سینسین اونا سیلی ووران ال کی رذیلیدی
هدف اینجیتمقیدی، ارثینی دانماق دلیلیدی
ائدن زهرانی بیمار و علیل والله او سیلی‌دی
اگر بیر آیری درده ابتلا گورسیدی ئولمزدی
سحردن آخشاما گؤز یاشی توکمخ ده دئیل بیر گون
مصیبت‌سیز گچن وارسا دئسین درمانده دیل بیر گون
او خوش گون کی قالیب حسرت اونا اون‌سگیز ایل بیر گون
جهاندا دخت ختم الأنبیا گورسیدی ئولمزدی
داغیلسا بیر جهان زهرانی حتی ییخماقا دگمز
خدا گؤردی بو دنیا ذره قلبین سیخماقا دگمز
او یوزدن آلدی تئز جانین،قضادن چیخماقا دگمز
اونا آلّاهی ذره غم رضا گورسیدی ئولمزدی
او قان کی سوزدی دیوار و دره عشقین ثبوتینده
اولوب پامال ایاق آلتدا ،باتیب امت سکوتینده
او مظلومه ئولن زهرا ،مسلمانلار قنوتینده
ریاسیز بیر ندای ربنّا گورسیدی ئولمزدی
نجه گچدی مدینه بیلمورم اؤز مهلقاسیندن
یاغور بارانِ محنت ایندی‌ده حال و هواسیندن
چتین اما چیخار زهرا ائدن ناله فضاسیندن
آخان گؤز یاشینه بیر اعتنا گورسیدی ئولمزدی
منه آسان دگول زهرا چکن آلامین اقراری
ئورک قانیله اِیلردی هر آخشام وقتی افطاری
فقط اولموشدی حیدر عشقینون زار و گرفتاری
بلا‌لر مادری آیری بلا گورسیدی ئولمزدی
فلک عومرونده زهرانی نه شاد ائتدی نه گولدوردی
ئولوم تنها دواسیدی،علییَه دردی بیلدیردی
اونی راحت ائدوب مظلوم علینون اشکی ئولدوردی
او گوزیاشدان صورا بیر کیمیا گورسیدی ئولمزدی
- چهارشنبه
- 4
- فروردین
- 1400
- ساعت
- 22:24
- نوشته شده توسط
- یوسف اکبری
- شاعر:
-
امین اسماعیل زاده ماکوئی
ارسال دیدگاه