یوم میلاد خانم فاطمۀ اطهرده
بئله فرمایش ائدیب ختم رسل منبرده

بویوروب امّتینه سید سالار بشر
خلق اولوب روحیمله نوریم ایکی پیکرده

اوّلی یار وفاداریدی پیغمبروزه
دوّمی خلق اولونوب دختر پیغمبرده

آلاجاق معرفتین درسینی زهرا مندن
اولاجاق خصلیتنون اوخشاری چوخ حیدرده

کیم اونا ایلسه حرمت منه حرمت ائلیوب
فرقی یوخ احمدیله فاطمۀ اطهرده

اولاً مظهر خلقتدی بونا یوخ شبهه
ثانیاً خدمت ائدن مزدین آلار آخرده

بئله اظهار ائلدی بوخبری روح الامین
شأن زهرانی خدا وصف ائلیوب کوثرده

تا خدا خلق ائلیه آدمی آب و گلدن
خلق اولونموشدی بونون نوری رُخ دیگرده

اونا بیر رتبه عنایت ائلیوب ربّ ودود
واردی بو رتبه او بانوی همایونفرده

کیم اذیّت ائده عالمده یقین فاطمه نی
یوم محشرده گرفتار اولاجاق چوخ درده

بیرین عفو ایلسه گر حشرده دلبند رسول
قالماز اُول نامۀ اعمالی اونون اللرده

چون قیامتده شفاعت ائلین خلقی اودی
امتین واردی گوزی چونکه بو خواهشگرده

قانلی قنداق علی اصغری آلسا الینه
بی گمان فاطمه حاضر اولاجاق محشرده

آلتی آیلقدی ولی باب الحوائج آقادی
نه گوزل منصب والادی علی اصغرده

دیه جک اوغلومون عاشقلری بیربیر گلسون
کیمده وار عشق حسین قالمیاجاق کیفرده

بولار اسباب شفاعتدی سیزه ای امّت
اصل بخششده کی مختصّیدی تک داورده

باباسی ختم رسل دور سیزیچون راهنما
قویماز امّت قالا محشر گونی درد سرده

کیمه اللّه بوگوزل مرحمتین ائتسه عطا
قالاجاق روزجزا محضر پیغمبرده

خوش اونون حالینه «تیموری» اوگون ختم رُسل
بویورا غصّه یمه واردی آدون دفترده

سنیده روز جزا ختم رُسُل عفوائله سین
اولسا تقصیروخطا سن کیمی بیر نوکرده
.