محنتی دنیانی دوتان فاطمه
گل کیمی گلشنده سولان فاطمه
وحیین ایوینده اوره گی قان اولان
ظلمین الیلن پوزولان فاطمه
آز یاشیییب چوخ غمه درده دوزن
دردینی قبره آپاران فاطمه
آی کیمی دنیایه گلن مکه ده
گون کیمی یثربده باتان فاطمه
عالمی یاندیردی سنون اولمه گون
باشه چاتان عمری جوان فاطمه
غم غمین اوستن اورگینده اکن
آزیاشیان تیز قوجالان فاطمه
یاپراقا بنزر یل الینده اسیب
تپراقا جسمی یخیلان فاطمه
گل چیچکه بنزریدی قامتون
ایلدی یاز فصلی خزان فاطمه
ایلدن اییردی قره اللر سنی
قلب لری دوتدی دومان فاطمه
هانسی یامان گوزسنه دگدی عزیز
یاخشینی اولدوردی یامان فاطمه
گوزلره سرمه ایاقون تپراغی
ایلمه تپراخدا مکان فاطمه
ای اوجا شانینده گلن "هل اتی"
اهل کسایه باش اولان فاطمه
عطر بهشتی اتاسی مصطفی
گل کیمی جسمیندن الان فاطمه
ام ابیها لقبیلن اونون
شهرتی عرشه اوجالان فاطمه
ام الائمه سنه جانیم فدا
یاره لی قبره قویولان فاطمه
یثرب اولوب یکسره ماتمکده
گویلره قوزاندی فغان فاطمه
غم گوتوروب کل بنی هاشمی
شهری دوتوب سوت اذان فاطمه
قاره علم لر اوجالوب شهرده
گیدی قرا کون ومکان فاطمه
سالدی ایاقدان علینی اولمه گون
قامتینی ایتدی کمان فاطمه
امتیلن تک قویوسان حیدری
امت ایلر باغرینی قان فاطمه
اللری قوینوندا علی اگلشیب
تتریوری دیزلر امان فاطمه
یول بیر اولان یوخ اونا سندن صورا
قالدی علی تک بو زمان فاطمه
مرهمیدون جسمینه هم جانینه
اوز ارینه روح وروان فاطمه
دردینی مولا دیه سنسیز کیمه
دردینه درمان یوخ اولان فاطمه
دوندی قرانلیق گجیه گوندوزی
گوزیاشینی ایتدی روان فاطمه
یخدی علینی بوغریب اولمه گون
سیندی بوگون سرو روان ،فاطمه
فاتح خیبر ایاقا دورماقا
طاقتی تابی یوخ الان فاطمه
زلفون الیب زینب نالان اله
سویلدی آی باغری یانان فاطمه
آی باجیا قارداشا حسرت قالان
زندگینین داشین آتان فاطمه
دویمامیشوخ بیز هله سندن آنا
گل یوزوی ایتمه نهان فاطمه
تاپشیروسان سن حسنینی کیمه
زینبی قویما نگران فاطمه
بو بالا کلثوم اوزونی اولدورور
باشوون اوستونده الان فاطمه
دردیمی سنسیز کیمه من سویلیوم
بیر نفره یوخدی گمان فاطمه
زینبوون یوخدی الیندن دوتان
کونلومی یوخ سنسیز الان فاطمه
شمع کیمی بو ایوه دور ویر ایشیق
آی کیمی بو ایوده دولان فاطمه
دور حسنین کوینگینی بیر توخی
وقت اذان اولدی اویان فاطمه
بیر گجه ده آی آنا محرابده
چادری سال باشه دایان فاطمه
- یکشنبه
- 8
- فروردین
- 1400
- ساعت
- 12:22
- نوشته شده توسط
- یوسف اکبری
ارسال دیدگاه