ال ایاق چالما بیله - آغلاما مهپاره بالام
یوخ الیمده گوروسن - تشنه‌لیقا چاره بالام
ایلمه آه و فغان - باغریمی گل ایلمه قان
آغلاما ئولسون آنان - لایلای علی (۲)
اوچ گونوز اوچ گیجه‌دی - سو یولونی کسدی عدو
مشگیلر خالی اولوب - یوخ داخی بیر خیمده سو
لااقل یوخدی دیلون - سسلیه‌سن یاندیم عمو
سنده اظهار ایده‌سن دردون علمداره بالام
منده سن تک ملرم - گوز یاشی گوزدن الرم
صبح اولونجا دیرم - لایلای علی (۲)
بی‌سبب دامنیمی اشگیله ایسلاتمامیشام
سودان اوتری هر - اودا - سن دیمه جان آتمامیشام
صبح اولونجا بو گیجه - منده اوغول یاتمامیشام
سینمی ایلمیشم - من سنه گهواره بالام
یانوب ایوای دیمیشم - باشه ووروب وای دیمیشم
سنه لایلای دیمیشم - لایلای علی (۲)
سنده من تک سو غمین بیر نولی باشدان آتاسان
دوزه‌سن تشنه‌لیقا - بو گیجه راحت یاتاسان
قورخورام ئولسون آنان قانه سو اوسته باتاسان
اولا بی‌کس آناوین بختی گونی قاره بالام
قوی ئوپوم گوزلریوی - توکمه چوخ اشگ‌تریوی
باغلادیم اللریوی - لایلای علی (۲)
نه دیوم بس کی اوغول صبحه قدر آغلاموسان
نه منی قیزلاریدا - بلکه اویاق ساخلاموسان
اوقدر بو قوریان سینمی دیرناخلامیسان
قان آخور یاره‌لریندن - ندی بس چاره بالام
گورورم اودلانوسان - سوز عطشدن یانوسان
منی درده سالوسان - لایلای علی (۲)
نصف شب بو سوزی بیر عاشق آزاده دیدی
منه بو هنگیده بیر سوز یاز "حسین‌زاده" دیدی
"اکرمی" یاندی اورکدن سوزی چوخ ساده دیدی
ال ایاق چالما بیله آغلاما مهپاره بالام
قسمت ایت کامه چاتاخ - اول حرمون بیزده گوراخ
خیمه‌گاهوندا دیاخ - لایلای علی (۲)
- دوشنبه
- 9
- فروردین
- 1400
- ساعت
- 12:18
- نوشته شده توسط
- یوسف اکبری
- شاعر:
-
امین اکرمی هاتف تبریز
ارسال دیدگاه