عشق رنگ بهار زینبدی
آی گون آئینه دارزینبدی

شهرتی باش گلور زمانلاردان
اوجادورشانی کهکشانلاردان
زینبون عطرزلفی مقتلده
قوزاناردی او پاک قانلاردان
رشتهء عشق بیکرانی اونون
اختیاری آلوبدی جانلاردان
خانمون دیللره حکومتی وار
سوروشون حقّه جانفشانلاردان
آستاننده کیم گدالیق ایدر
منّت حاشا چکه جنانلاردان
ئوپمگه خاک پای زینبدن
یاغار اولدوزلار آسمانلاردان
نیلیوب گورعلی قیزی زینب
حسنی باج آلدی قهرمانلاردان
دیللری جلوه لندیرن جوهر
ذکرنام و شعار زینبدی

جلوهء باغ یاسمن لردی
روح لر قالبی بدن لردی
زینتِ بزمِ موسفید حَرم
قاره اِحرام، سینه زن لردی
زائر تَلِ غیرتِ زینب
ماتمِ زینبه گلَن لردی
اَگمین ذلّته حَقارته باش
عشقی زینبدن ئورگنن لردی
یوخدی شکّیم که طایرملکوت
قاره پرچم لری ئوپَن لردی
باورایله گلابِ جامِ بهشت
اشکِ یا زینبا دِیَن لردی
بوی دامان زینبِ زهرا
بی گمان زینت چَمن لردی
زینب آئینهء شرافتدی
قصه پردازِ بی کفَن لردی
نهضت حقده زلف خون آلود
سَنَدِ اعتبارِ زینبدی

خدمت عشق سیم و زرسزدی
زندگی بی هدف ثمرسز دی
عشق زینبده یانمیان سینه
عین بیرگنج دور گّهرسزدی
چکمسه نقش کربلانی دیله
خبره نقّاش لرهنرسزدی
عشق ایوینده گراولماسازینب
عینِ بیرعرشیدی قمرسزدی
دل که زینب دیمکده عار ایلدی
مین چمن گُل اَکه اثرسزدی
گوزی چخسون اولارکه فکرایلیور
زینبون نهضتی ظفرسزدی
سائلِ زینبون حضورینده
جامِ جمشیدلَر دَیَرسزدی
ذوالفقار دوسَردَه بی زینب
هانسی الده اولا کَسَرسزدی
کاخ طاغوتی تارومار ایلَمَک
عزّت و اعتبار زینبدی

سینه بی پیچ و تاب اولانمزدی
یانماقیم کم شتاب اولانمزدی
بَعدِ غارت که باتدی کامل گون
دل سکوته مُجاب اولانمزدی
نصفی یانمش چادردا مَحشریدی
درد بی بازتاب اولانمزدی
اوگئجه نوحه خوان مَلَک لَرایدی
آیری بیر انتخاب اولانمزدی
هرنه حُورا وارایله سیدی نوا
لایلای رُباب اولانمزدی
سینه سینده صُودی اود اولمشدی
بوندان آرتیق عذاب اولانمزدی
چشمِ آهو وَشِ رقیّه کیمی
قان یاغشلی سَحاب اولانمزدی
اولماسیدی بلا چکن زینب
شهدا کامیاب اولانمزدی
مکتب پاکِ شیعهء عَلوی
بهترین یادگار زینبدی