عشق امتحانه چکدی منی انتخابیلن
هم عهدایدوب حسین پسر بوترابیلنبوسه ورآندا حضرت یار آستاننه
الفت تاپوب الیمده قلم شعرِ نابیلن
ویردیم نگاره قولِ شَرف تاکه زنده ام
صادق اولام وفاده او عالی جَنابیلن
روحیم فدا بوعشقه منی قیلدی آشنا
زهرانون اوغلی باشلادیقی انقلابیلن
بیلدیم که کربلایه قدم قویجاقین امام
شمشیراَشقیا اولوب عُریان شتابیلن
مقصود و مقصد سَفرین ایتدیلرسئوال
سندردی اهل کوفه نی مُحکم جوابیلن
خیمه نشین ایدوبدی فلک آلِ عصمتی
بیگانه اولدی گوزلری آسوده خوابیلن
کوتاه شعریم عارفه کافی اشاره دور
آبِ فرات آخاردی او چولده زهابیلن
عطشانیدی حَرملری زهرا عزیزینون
ایسلانمادی دوداقلاری افسوس آبیلن
عباس تا محافظ اخیام عشق ایدی
یوزمین نَفَر چکردی نَفَس اضطرابیلن
اُون مینجی گون محَرم آئی صبح ایدوب طلوع
مَحصور اولوب بَنات، غمِ بی حسابیلن
مین لر کتاب یازسا قلم لر مَحالیدور
شرح ایلیه بومحنتی چوخ آب وتابیلن
آتمش بیر ئیلدی سوزیازورام ، عاجزم یازام
تیر سه شعبه نیلدی طفلِ ربابیلن ؟
غنچه گُل آچدی، دست امامِ غریب ده
دولدوردی باغباندا ئوز ئوجین گُلابیلن
نازک بوغازدا باخدی دَرین یاریه حسین
بیر فکرایدوب اولحظه ده قصدثوابیلن
یاخدی محاسینه اوقانی رَبّنا دیدی
فاش ایتدی راز عشقینی مالک رقابیلن
اذن ایستیوبدی بوسه ورا پاره حَنجره
آلدی جوابِ یارینی ، قلب کبابیلن
اوخ یاره سین ئوپَنده حسین حوریلر دیدی
بَه بَه ستاره بوسه لَشور آفتابیلن
- شنبه
- 14
- فروردین
- 1400
- ساعت
- 23:0
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه