گنه شکر لله کی ميلاد اولوب
بحمدالله اهل ولا شاد اولوب
يازيم لطف حقّيله بير مثنوی
تايين يازميوب انور و منزوی
سحر چاغی سِحر حلاليله من
گزيرديم، زمانی، خَياليله من
قييتديم دالی پنجم هجرته
دئنن مرحبا بير بئله همّته
اؤتورموشدوم ائوده باخيرديم گويه
گوروردوم گلور بير گوزل قوش ائوه
او دم سؤيلدی هاتف ملک راز
بشيرا بشيری ائله پيشواز
صدای محبت سسيندن گلور
بنی هاشمين کوچه سيندن گلور
دوروب ياکريمه سلام ايلديم
قنادين ئوپوب احترام ايلديم
دئدی گل گئداق شهر پيغمبره
او شهر ايچره واردور گوزل منظره
دئديم ای بشارت قوشو ياکريم
منيم اوچماقا يوخدو بال و پريم
دئدی غم يئمه٬ سن به صوت جلی
گوزون يوم چاغور صدقيلن ياعلی
اوجاتديم اليمی به حال قنوت
اليمدن دئديم دست لطفيله دوت
ائليکی دئديم خُذ يَدی يا علی
اليمدن ياپوشدی يدالله اَلی
او قوش اوشدی آرديجا من پُر شتاب
دييردون شاخور گويده بير جوت شهاب
اولوبدور جمادیّ الاوّل آيي
گوزيمی آچوب گويده گوردوم آيي
نه آی، عالمی ايليوب منجلی
بودور مطلبين آخيری اوّلی
او آيينه دور آی دگول بی گمان
وئرور زينبين نور پاکين نشان
تخيّل گوزيله باخاندا يئره
گوزه جلوه لندی گوزل منظره
گوزيمه گوروندو ولايت باغی
ولايت باغی يا محبّت باغی
همان باغ کی مشهور اولوبدور فدک
چيچک درديم اُول باغيدن بير اتک
دريب دست عشقيله گول باغلاديم
ز بس شاديديم شوقيدن آغلاديم
ديوم نه گولو درديم اُول باغيدن
چکيلمز ایيي باغيدن داغيدن
قيزيل گول، گورنده ديير خاص و عام
رسول امينه درود و سلام
قيزيل گوللری ايسترم جان کيمی
نه جان، ايسترم بلکه جانان کيمی
او بير دسته گول بلبل ائتدی منی
دولانديم سراسر او خوش گلشنی
گوزل بير ثمردور گل تجربه
يئتيشديم غرض بلده ی يثربه
نه گوردوم ائدور بحر نور اوردا موج
سمادن ملک لر گلور فوج فوج
سپور جنّت اهلی او شهره گلاب
يئر اهلينی مدهوش ائدور عطر ناب
دئديم ياکريمه کرم ايلدون
منی لايق بو حرم ايلدون
حرم يوخ حريم عدن دور بورا
کی کاشانه ی پنج تن دور بورا
دئدی باخ او پنج تنين جمعينه
او جمعين ايچينده حيا شمعينه
باخاندا نه گوردوم عجب خانه دی
بيری شمعدور دوردو پروانه دی
اونا بيلمورم شمع يا گول ديوم
او گول عشقینه خلقه بولبول دیوم
خانيم فاطمه گولدو جنّت گولو
سارالماز يقين باغ عصمت گولو
قوجاقه آلوب بير گوزل غنچه نی
او غنچه صفالنديروب گلشنی
ائله غنچه، گول مثلی اطيب دی او
آتا زینتی یعنی زینب دی او
او مولود زيبادی گول پيرهن
قوجاقه آلور بیر به بير پنج تن
نبیّ و علیّ و بتول و حسن
گولوللر، چمنده گولور ياسمن
اولوب زينب اُول گلشنه زيب و زين
آچوب بال و پر قوش مثالی حسين
دئديم آديوه من فدا ياحسين
عزيز دل مصطفی ياحسين
گل باغ خیرالنسا یاحسین
فروغ رُخ مرتضی یاحسین
او آلله کی خلق ايليوب کوکبی
سنه گورمه سين چوخ، باجون زينبی
منيم باشيمه سايه سال ياحسين
بو دسته گولو مندن آل ياحسين
گولو آلدی مندن وئروب زينبه
دئديم شکر اولا چاتموشام مطلبه
گنه اُول گولو وئردی مولا منه
منی تاپشروب خالق ذوالمنه
بويوردی فدکدن دروبسن آپار
اونو سن وئر عشّاقيمه يادگار
اولان ای امام حسين عاشقی
حسين چوخ سؤور عاشق صادقی
صداقتله من گلموشم هيئته
سیزون تک نچون عاشقم عترته
ولايت بهارين گوروب گلموشم
مدينه ديارين گوروب گلموشم
بورا گلموشم عشقه تعظيم ائدم
بو دسته گولو بلکه تقديم ائدم
اوزوم خارم امّا سوزوم دسته گول
اگر چه چوخ اولدو ولی بس دگول
الهی هامی درده ايله دوا
بوگون هر مريضه اوزون وئر شفا
کيمين حاجتی واردی ايله روا
بيزه قسمت ايله گنه کربلا
خانيم زينبه خاطر ای دادگر
عنايت ائله قوی سوزومده اثر
حسين درگهينده غلام اولموشام
اودور لايق احترام اولموشام
به حقّ حسين و به حقّ حسن
باغيشلا منی ای حق ذوالمنن
- یکشنبه
- 15
- فروردین
- 1400
- ساعت
- 20:42
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه