ایّام فاطمیّه ده اهل غم آغلیار
قلبینده غملری اولونار مُدغَم آغلیار
عمری آز اولدو فاطمه نین گول کیمی،اودور
حسرت چکر صورا او کسی که کم آغلیار
ائتدیقجه زمزمه علی آیات کوثری
ساقیّ کوثرین حالینا زمزم آغلیار
چاهه دییر اؤرک سؤزونو مو به مو علی
ایلر بهانه چاهی او قدّی خم آغلیار
قاره چکر بهشته بهشت اهلی آهیله
حوّا دیینده فاطمه وای آدم آغلیار
جنّت خانیملاریلا خدیجه دوتار عزا
سارا و هاجر اوخشویاراق، مریم آغلیار
پیغمبره تسلّی وئرر انبیاء حق
زهرایه ساخلار اهل ولا ماتم آغلیار
شهر مدینه نین گؤزلی یعنی مجتبی
چکدیقجه آه، حالی اولار برهم آغلیار
کرب وبلاده مجلس ماتم دوتار حسین
دؤرد مین ملک او حضرتیله باهم آغلیار
عبّاس، نهر علقم اوسته دییر وای جوان ننه
احوالینه فرات یانار، علقم آغلیار
آغلار آنا غمینده امام زمان مدام
چون کی جوان آناسی ئولن هر دم آغلیار
بیزلر ائشیتمریق آقانین آغلاماق سسین
امّا ملائکه ائشیدر توأم آغلیار
کوچه به کوچه حضرت صاحب زمان گزر
هر کوچه ده گؤرنده قرا پرچم آغلیار
سؤیلر آنا ظهوریمه ایله دعا اؤزون
سرّ ظهوره هر کیم اولا محرم آغلیار
گویلوم چوخ ایستیور تئز آلام انتقامیوی
قلبیم دؤنوبدی قانه گؤزوم نم نم آغلیار
ایّام فاطمیّه ده یاری گئجه «بشیر»
غم دفترینه هم یازار آدون هم آغلیار
- یکشنبه
- 15
- فروردین
- 1400
- ساعت
- 20:54
- نوشته شده توسط
- یوسف اکبری
- شاعر:
-
سیدبشیر حسینی میانجی
ارسال دیدگاه